Iyi gahunda igamije guca imyumvire y’abaturage bitwaza ubukene maze bakarwaza bwaki. Kurwanya bwaki ntibisaba amikoro menshi; nk’uko bisobanurwa na Musabyirema Jeanne d’Arc ushinzwe ibijyanye n’imirire mu mushinga IBYIRINGIRO akaba ari nawe uyobora izo nyigisho.

Muri izo nyigisho ababyeyi bose bafite abana barwaye bwaki bazana n’abana babo maze bagatekera hamwe kandi bakagaburira abana ndetse bakanasabwa kubigenza gutyo iwabo.

Angeline Mukabandora umaze imyaka ibiri akorana n’umushinga IBYIRINGIRO atanga ubuhamya bwuko kwigishwa guteka no guhinga kijyambere byatumye abuzukuru be bakira bwaki ubu nawe akaba ari mu itsinda rigenda ryigisha abandi hirya no hino mu murenge wa Matyazo.

Nyamara ariko hari n’ababyeyi barwaje bwaki bakivuga ko kubona ibikoresho nk’ibyo ababigisha bakoresha bitoroshye ndetse ko kutagira ifumbire biri mu bituma badahorana ibyo bifashisha mu gutekera abana nk’imboga n’ibindi.

Mukandayisenga Alphonsine, umwe mu barwaje bwaki witabira izo nyigisho yemeza ko we akennye ku buryo aribyo bituma umwana we adakira. Avuga ko we n’umugabo we batunzwe no guhingira rubanda ibyo bita guca inshuro.

Umukozi w’umurenge wa Matyazo ushinzwe imiberehomyiza y’abaturage, Nzabarinda Bagirishya Patrick, yemeza ko nubwo hari abaturage bakennye iyo myumvire atariyo kuko ako gace kera ibintu byinshi ahubwo bikaba biterwa no kutita ku bana babo.

Icyakora ngo harateganywa gahunda yo gufasha abantu nk’abo kubona ifumbire borozwa cyangwa baragizwa amatungo kubabishoboye.

Ernest Kalinganire