Continious Development program (CPD) ni gahunda igiye gutangwa bwa mbere mu gihugu n’ibitaro byigenga, muri gahunda ya minisiteri y’Ubuzima, igamije gukarishya ubumenyi, nk’uko bisobanurwa na Dr. Rusungu Laurent umuganga mu bitaro la Croix du Sud, ubwo bayitangiraga kuri uyu wa Gatanu tariki 15/03/2013.

Yagize ati: ”Ni gahunda izajya ihabwa abaganga cyane abo mu bitaro byigenga babyifuza, cyane ko itazabicira akazi kuko tuzajya dutangira nyuma y’akazi”.

Dr. Rusungu avuga ko umuganga wese ukorera mu gihugu asabwa kuba afite amanota runaka mu gihe cy’imyaka itatu, utazajya yuzuza iki gipimo akazajya atemererwa gukomeza umwuga we mu gihugu imbere.

Dr. Segni Mekonnen, umwe mu batanze amahugurwa avuga ko umwuga w’ubuganga uhora mu bushakashatsi, haba ku ndwara nshya cyangwa se no ku zisanzwe, bityo ngo abaganga bakaba bagomba guhora bahugurwa kugira ngo bagendane n’igihe.

Ati: “Ni ngombwa cyane ko abaganga bahora bahugurwa kuko ubuvuzi ari urwego ruhora ruhindagurika, bitewe n’ubushakashatsi buhora bukorwa ku ndwara nshya, imiti mishya n’ibindi”.

Ku munsi wa mbere, abaganga bahuguwe ku bijyanye no kwakira neza abafite virusi itera SIDA, aho muri ibi bitaro bafite uburyo bwihariye bwo kubabikira ibanga, kuko badafite ahantu handitse ko bakira abafite icyo kibazo. Ibi rero bishimwa cyane n’ababagana.

CPD ni gahunda aho buri muganga ukorera mu gihugu asabwa kujya akurikira, ngo ntabwo izorohera abaganga bakora mu mavuriro yigenga, bitewe no kutabona umwanya. Gusa ibitaro la Croix du Sud byayishyize nyuma y’amasaha y’akazi ngo byorohereze abaganga.

Jean Noel Mugabo