Igerageza rya mbere ry’urukingo rwa Covid-19 ritangiriye muri Afurika y’Epfo

Igerageza rya mbere ry’urukingo rwa Coronavirus rigiye gutangira muri Afurika y’Epfo. Ibi byatangajwe na Kaminuza ya Wits y’i Johannesburg muri Afurika y’Epfo, rikaba ari na ryo gerageza rya mbere muri Afurika rigiye gutangira.

Uru rukingo ruri mu igerageza, abahanga barwise Ox1Cov-19, bakaba bari kureba niba rushobora gukingira umubiri w’umuntu Covid-19, abantu ba mbere bakazaruterwa muri iki cyumweru.

Muri Afurika y’Epfo abantu 80,000 bamaze kwandura iki cyorezo, kikaba kimaze guhitana abagera ku 1,674.

Profeseri Shabir Madhi w’umuhanga mu by’inkingo muri kaminuza ya Wits, ni we uyoboye igerageza ry’uru rukingo muri Afurika y’Epfo, ubushakashatsi bafatanyijemo na kaminuza ya Oxford yo mu Bwongereza hamwe na Oxford Jenner Institute yarukoze.

Avuga ko mu cyumweru gishize aribwo batangiye gusuzuma abo bazakoreraho igerageza, akavuga ko aba mbere baterwa urwo rukingo muri iki cyumweru.

Abagiye gukora igerageza ry’urwo rukingo bavuga ko rwabanje kugenzurwa no kwemezwa n’ikigo cya Leta ya Afurika y’Epfo gishinzwe kwemeza ibikoreshwa mu gihugu.

Mu Bwongereza ngo rumaze guterwa abantu bagera mu 4000, rukaba ruri no kugeragezwa muri Brazil ndetse hakaba hanateganywa irindi gerageza ryagutse muri Leta zunze ubumwe za Amerika, aho ruzageragerezwa ku bantu 30,0000

Abashakashatsi bakoze uru rukingo bavuga ko isuzuma ryakozwe muri laboratoire rigaragaza ko bimwe mu birugize bishobora kwica iyi virusi, bakavuga ko bizeye ko nirugera mu mubiri w’umuntu ruzabasha kuwuha ubudahangarwa ku buryo virusi ya SARS-CoV-2 itera indwara ya Covid-19 itawuhangara.

Abari gukora iri gerageza kandi bavuga ko izo nkingo zigaragaza ko nta ngaruka zigira, n’ubwo zishobora gutera guhinda umuriro, kuribwa umutwe no kubabara akaboko by’igihe gito.

Mu kwezi gushize, aba bashakashatsi basabye leta ya Kenya ko uru rukingo rugeragezwa ku bantu 400, inzego zibishinzwe muri Kenya zikaba zitaremeza ko igeragezwa ritangira.

Kugeza ubu mu bice bitandukanye by’isi hari gukorwa inkingo z’ubwoko busaga 100 za Covid-19.

Shakisha izindi nkuru
kigalitoday android app mobile

Ibitekerezo   ( 2 )

Ahubwo x kuki baza kugeragereza kubanyafrika
Nitwebwe nsina ngufi?

Ahmed Manuel yanditse ku itariki ya: 26-06-2020  →  Musubize

Ese none mbere yo kugeragereza urwo rukingo muri Afurika y’epfo aho mu Bwongereza no muri Brazil rwageragerejwe hari umusaruro byatanze? ese nta bibazo rwateje ku barutewe? ni ukwitonda tugashishoza cyane.

DUSENGIMANA JEAN DE LA PAIX yanditse ku itariki ya: 23-06-2020  →  Musubize

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka