Ubwo bagezaga ku nteko ishinga amategeko ibirebana n’ingengo y’imari iyi Ministeri igenerwa, Minisitiri w’ingabo, General James Kabarebe, yabwiye abadepite ko ibi bitaro bikeneye ibintu byinshi bishingiye ku mikoro ariko icyo cyerekezo cyo ari ndakuka.

Yagize ati: “Dufite icyerekezo cy’uko ibi bitaro bigomba kuba ibitaro by’icyitegererezo ku buryo byazagabanya ingendo n’amafaranga Abanyarwanda batanga bajya kwivuza mu mahanga”.

Minisitiri Kabarebe yakomeje avuga ariko ko hakenewe imbaraga nyinshi ndetse n’amikoro kugira ngo ibyo bizagerweho.

Ati: “Birumvikana turasabwa guhugura amaganga benshi baminuje muri service zitandukanye (specialists), bizasaba ibikoresho byinshi n’ubu turavugurura, ndetse no gutira abaganga ahandi mu gihe tuzaba dutegereje abacu bahoraho”.

Hagati aho ariko, Ministeri y’ingabo yagaragarije abadepite bagize Komisiyo ishinzwe kugenzura imikoreshereze y’imari ya Leta, ko hakiri ikibazo kirebana n’imishahara y’abakozi b’ibi bitaro.

Colonel Dr Ben Karenzi uyobora ibi bitaro, yavuze ko ibi bitaro bifite icyuho cy’akayabo ka miliyoni ebyiri n’ibihumbi 700 mu mishahara y’abakozi bagera kuri 790 ibi bitaro bikoresha.

Aba bakozi ngo bahembwa amafaranga atajyanye n’uko imishahara yagenwe na Ministeri y’abakozi ba Leta n’umurimo. Iyo mishahara kandi ntihwanye n’iy’abakozi b’ibindi bitaro bikuru mu gihugu nka King Faisal Hospital na CHUK.

Abadepite bagize iyi Komisiyo, bagaragaje ko bagiye gukora ubuvugizi ibitaro bya gisirikare bya Kanombe, bigahabwa ayo mafaranga bikeneye ngo kuko byifashishwa n’umubare munini w’Abanyarwanda cyane cyane baturuka mu bice by’icyaro.

Christian Mugunga