Huye: Abivuriza kuri RAMA ntibahawe serivise bijejwe mu gukingira Hepatite B

Nyuma y’uko ibitaro bya Kaminuza by’i Butare (CHUB), byatanze amatangazo ahamagarira abantu kwikingiza ku buntu indwara ya Hépatite B, abivuriza kuri RAMA ntibahawe servise bari bijejwe.

Itangazo ryari ryatanzwe n’ibi bitaro ryavugaga ko ababyifuza bazabagana hagati y’itariki 23 na 27 Nzeri 2019, bagapimwa Hépatite B, hanyuma abo basanze barwaye bakazahabwa imiti, naho abatayirwaye bagakingirwa.

Iri tangazo ryashishikarizaga abafite ubwishingizi bwa mituweri kuzaza bitwaje amafaranga 500, naho abasanzwe bivuriza ku bundi bwishingizi nka RAMA bakaza bitwaje amafaranga 1,500 yo gukorerwa ibizamini.

Icyakora, abafite ubwishingizi bwa RAMA bo ntibakiriwe nk’uko bari babyiteze nk’uko bivugwa n’umugabo utarashatse ko amazina ye atangazwa.

Agira ati “Abafite ubwishingizi butari ubwa mituweri wabonaga batagusobanurira neza. Nageze hano mu ma saa mbiri, ariko mu ma saa sita n’igice maze kuzurisha impapuro za ngombwa ni bwo bambwiye ko RSSB itemeye kuturihira. Nari niteguye kwishyura ibihumbi bitatu ariko nirihiye 100% ntanga 28,629Frw.”

Hari n’undi uvuga ko byabaye ngombwa ko asubira mu rugo gushaka mituweri. Ati “Kuko nari narishyuye mituweri nkabona RAMA nyuma, byabaye ngombwa ko njya gushaka mituweri, ndaza baramfasha.”

Abatabashije guhita babona amafaranga yo kwirihira 100% n’abatari bafite izindi mituweri bo byarabayobeye barataha. Icyakora ngo hari ababanje kwitonganya cyane, abandi babwira nabi ababakiraga.

Icyifuzo cy’abari baje kwaka iyi serivise ni uko ibyo babwiwe bitajya binyurana n’ibyo bahabwa.

Uwiyishyuriye 100% ati “Uguhakaniye hari igihe umwishyiramo kuko uba utekereza ko waje mu buryo buzwi. Abatanze amatangazo bajye bakurikirana barebe ngo ese ibyo twasezeranyije abaturage byakozwe?”

Dr. Théogène Twagirumugabe, umuyobozi wa CHUB wungirije ushinzwe ibikorwa by’ubuvuzi n’ibibushamikiyeho, avuga ko abivuriza kuri RAMA batahawe serivise uko bari babyiteze, kuko RSSB yatinze kubemerera kuzagira uruhare mu kurihira abakorana na yo bafatishije ibizamini.

Abiseguraho, akanabizeza ko amaherezo iyi serivise bazayihabwa ati “Igisubizo ntikiraza kugira ngo abakozi babo bakurikize amabwiriza bahawe. Ku munsi wa kabiri bizakemuka, nibitanahita bikemuka tuzabashyiriraho gahunda yabo.”

Uyu muyobozi anavuga ko abaje muri iyi gahunda yo gukingira Hépatite B bashaka kumenya niba nta na Hépatite C bafite, bagomba kuza bitwaje inshuro ebyiri z’amafaranga yari mu itangazo.

Umugore utwite yarindwa kuyanduza umwana

Dr. Twagirumugabe asaba kandi abagore gushyira imbaraga mu kwipimisha igihe batwite, kuko kwa muganga babapima Hépatite B, basanga bayirwaye abana babo bakazayikingirwa bakivuka.

Dr. Twagirumugabe avuga ko ku bana 100 bayandujwe n’ababyeyi, batanu bonyine ari bo baba bafite amahirwe yo kuyivurwa igakira, nubwo kugeza ubu imiti ihari baba bazayifata mu buzima bwabo bwose. Naho 95% basigaye bo ngo ibatera kanseri.

Naho ku bayanduye ari bakuru, 25% ni bo ishobora gutera kanseri, abandi bagakomeza kunywa imiti ntibagireho ingaruka, kuko nubwo virusi ziyitera ziba zikiri mu mwijima, mu maraso nta ziba zigitemberamo.

MENYA UMWANDITSI

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.