Uru rugendo shuli Akarere ka Nyabihu karukoze nyuma yaho utu turere twombi twaje dukurikirana ku myanya ya nyuma muri gahunda y’ubwisungane mu kwivuza, umwaka ushize wa 2013.

Impamvu nyamukuru Akarere ka Nyabihu kahisemo kuza kurebera ku karere ka Gatsibo, ngo ni uko aka Karere ka Gatsibo ubu kari ku mwanya wa mbere mu kwitabira kwishyura amafaranga y’ubwisungane mu kwivuza, nk’uko bitangazwa n’Umuyobozi w’Akarere ka Nyabihu wungirije ushinzwe imibeereho myiza Sahunkuye Alexandre.

Sahunkuye Yagize ati: “byaradutunguye cyane biranadutangaza uburyo Akarere ka Gatsibo, uyu munsi kari ku mwanya wa mbere mu kwishyura amafaranga y’ubwisungane mu kwivuza, bityo rero uru rugendo twiteguye kurukuramo byinshi by’ingenzi, ubu natwe icyo tugiye kukora mu Karere dusinzwe kuyobora ni ugukoresa uburyo bwo kwibumbira mu matsinda.”

Sahunkuye yakomeje avuga ko icyateye Akarere ka Nyabihu kuza mu myanya y’inyuma mu kwishyura ubwisungane mu kwivuza, ahanini ngo ni imyumvire y’abatuye ako karere, aho usanga umukecuru cyangwa umusaza w’imyaka 60 akubwira ko arinze agera mu z’abukuru atararawara na rimwe, ibyo ngo bigaterwa n’imiterere y’aka karere ka Nyabihu kuko gakonja cyane.

Uru rugendo rwari ruyobowe n’Umuyobozi w’Akarere ka Nyabihu wungirije ushinzwe imibereho myiza, aherekejwe n’abanyabanga nshingwabikorwa b’Imirenge yose igize ako karere ndetse n’abacungamutungo ba za Sacco zibarizwa mu Karere ka Nyabihu.

Uru rugendo kandi rwari rwitabiriwe n’Ubuyobozi bukuru bw’Akarere ka Gatsibo, abashinzwe ubwisungane mu kwivuza muri aka karere, n’Abanyamabanga nshingwabikorwa b’Imirenge ya Gitoki na Kiziguro, iyi mirenge akaba ari nayo yabaye intangarugero mu kwishyura ubwisungane mu kwivuza hifashishijwe uburyo bwo kwibumbira mu bimina.

Benjamin Nyandwi