Mu gihe Leta isaba buri wese kwakirana urugwiro abamugana no gutanga neza servisi baba bamutezeho, urujya n’uruza rw’abantu benshi bajya kwivuriza ku bitaro bya Kanombe, ngo ruraterwa n’icyizere abarwayi babifitiye, kuko byubahirije imitangirwe ya servisi inoze.

Iyo ikinjira mu marembo y’ibitaro bya Gisirikare i Kanombe utambuka ku musirikare n’umusivili ariko bombi ntawabona akanya habe n’umunota umwe wo kukuganiriza ibitajyanye n’akazi, bicaye mu kazu abatahazi babanza kubarizamo amakuru ajyanye n’ibyo bifuza.

Indoro n’ijambo byiza ngo bivura nk’ikinini

“Ndaba nkureba, genda maze ukatire hariya iburyo urahita ubona abandi bakwakire”, niko uwo musirikare yanyoboye.

Mu gisurubeti cyera de kitagira ikizinga na kimwe, umukobwa wari uhagaze mu nguni aho narengeye umusirikare atakimbona, yahise ambaza ati ‘Murifuza nde?”

Uwo mwari wakira abantu akabarangira uwo bagana, ari kumwe n’abarwayi abaganiriza, mu gihe muganga aba ari kuvura umwe umwe; yaramperekeje ansekera ngira ngo yankunze; tugeze hirya aho bakirira ibyangombwa by’abarwayi, arahamagara ati “Alice, dore umushyitsi nkuzaniye!”

Nasanze Alice ahuze cyane, niko kumubwira ko ikibazo cyanjye kitihutirwa cyane kurusha abo mpasanze, musaba kubanza kwakira abari bamuhagaze imbere, maze mbanza kuganira n’abarwayi bari aho, bategereje ko babakira.

Mbere gato yuko bamuhamagara ngo ajye kwisuzumisha, Umusaza Ruboneka Claver yabanje kunsobanurira uko byamugendekeye ubwo yageraga ku bitaro bya gisirikare bya Kanombe.

Yagize ati “Nanjye nabanje kugira ngo uriya mukobwa yankunze cyangwa hari icyo dupfana, byatumye ntumva ububabare bw’uburwayi bwankuye mu karere Gatsibo. Icyizere cyo gukira cyatangiye kunzamo nkurikije uburyo bandeba bansekera, bakanambwira neza”.

Lt. Col. Dr Furaha, umuvuzi mu bitaro bya Kanombe na Prof Adamson watanze ubufasha, baganiriza umwe mu barwayi.

Ntabwo byoroshye ko umuntu utarembye cyane, yaba umukire, Afande, cyangwa undi muyobozi ukomeye; yatambuka ku muntu wazindutse akaba ariwe wakirwa mbere; kuko uhageze wese ahita ahabwa akanimero kamuhesha kuza kwakirwa, atarenganijwe cyangwa ngo abyigane n’abo ahasanze.

Banga ko abarwayi bibona ari benshi cyane, buri wese ahita yoherezwa kuri muganga umushinzwe

Ibitaro bya Kanombe byaguye inyubako zabyo bitewe no kugira abarwayi benshi cyane.

“Buriya byakemuye ikibazo gikomeye cyane, ubu aho ujya hose urahasanga udutsinda tw’abantu bake bategereje muganga, aho kugirango abarwayi bicare mu kivunge, kuko nabyo bica intege”, nk’uko umubyeyi witwa Kayitesi Cecile Karasira yasobanuye.

Ati: “Wavugaga ibyo kukureba no kukubwira neza! Jyewe ndwaye indwara idakira, nkaba maze imyaka ibiri nza kwivuriza hano ku bitaro bya gisirikare. Si uko nyobewe ko n’ahandi bavura, ariko kuba uburwayi ntacyo buntwaye mbikesha icyizere muganga wa hano ahora ampereza”.

Bubahiriza “Rendez-vous” bagiranye n’umurwayi kandi bakirinda kumurangarana

Umuntu uzindutse, atarembye ahabwa akanimero, agategereza nk’iminota 10 akumva baramuhamagaye. Aravurwa uwo munsi nk’uko abarwayi babyemeza, ariko uwakererewe nawe ngo bamumenyesha hakiri kare ko atagomba kwirirwa yicaye atari buvurwe uwo munsi.

Kayitesi agira ati: “Haba hari abashinzwe kugenzura umunota ku wundi ko nta muntu watereranywe cyangwa uri aho atagomba kuba, ndetse n’imyitwarire y’abakozi.”

“Aho kugirango wirirwe aha cyangwa uhamare amasaha utegereje, usiga nimero ya telefone, bakakwihera “rendez-vous” y’umunsi wa vuba n’isaha uzagarukiraho, kandi barayubahiriza pe! Iyo bataguhamagaye mbere yaho ngo bakubwire ko gahunda yahindutse, ntibizakubuze kuza kwivuza”; nk’uko uwo mubyeyi yongeraho.

Ibiciro bito, bose bakavurwa

Ibitaro bya gisirikare biri i Kanombe byakira amakarita y’ubwishingizi bw’ubuvuzi yose yemewe mu Rwanda, ngo abantu bavurwa ku biciro bisanzweho hatarebwe icyiciro cy’ubukire umuntu arimo, nk’uko Alice Umugwaneza, ushinzwe kureba imikorere n’uburyo bakira abantu, yasobanuye.

Ingabo ziri kumwe na Guverineri Kabahizi w’Uburengerazuba, zagiye muri Army week i Gihundwe mu karere ka Rusizi.

Ibi bitaro ariko biri ku rwego rw’ibitaro bikuru; bivuze ko abakoresha ubwisungane mu kwivuza busanzwe (mituelle de sante) babanza kunyura ku bigo nderabuzima n’ibitaro bito by’uturere bakabaha icyemezo (transfert,) cyerekana ko indwara yananiranye ku baganga basanzwe.

Yongeraho ko i Kanombe batajya bohereza abarwayi kugurira imiti ahandi, nk’uko hari abaturage binubira ko babikorerwa n’ibigo nderabuzima cyangwa ibitaro bimwe na bimwe.

Icyizere cyaturutse ku bikorwa biteza imbere abaturage bya “Army week”

Abasirikare bamenyekanye cyane mu baturage ko bafite ubuhanga buhanitse mu kuvura, mu gikorwa cyiswe “Army Week”, ingabo z’igihugu zijya zibakorera buri mwaka nta kiguzi zibasabye.

“Dufite impuguke utasanga ahandi mu Rwanda”, nk’uko Alice Umugwaneza yatangaje, ko n’umuntu ufite imiterere yihariye nk’ibibyimba mu mubiri, bamugorora akamera nk’abandi bose.

Ariko nabo “nta kiguzi basabwa gutanga ngo bagire mu maso harangwa n’inseko no kutongera amagambo mabi ku murwayi wibabarijwe n’umusonga”, nk’uko Ministiri w’ubuzima, Dr Agnes Binagwaho ahora yibutsa abashinjwe kwita ku buzima bw’abantu.

Simon Kamuzinzi