Abacunga umutekano, abakorera inganda n’Abihayimana hafi 3,000 i Kigali bakingiwe Covid-19

Muri gahunda ikomeje yo gukingira Covid-19 mu gihugu hose, kuri uyu wa Gatandatu tariki 13 Werurwe 2021 hakingiwe abanyenganda n’abakozi bazo mu gice cyahariwe inganda i Kigali cyitwa Special Economic Zone(SEZ) barenga 1,278.

Mu banyenganda bakingiwe harimo umuturage uturuka mu gihugu cya Mali ukora ibinyanye no gutubura imbuto z’ibigori witwa Soumana Abdoulaye Djiro, uvuga ko hari inyungu nyinshi mu guhabwa urukingo rwa Covid-19.

Soumana yagize ati "Inyungu mfite ziri mu rwego rw’ubukungu kuko icyorezo Covid-19 cyarabushegeshe cyane, ariko mu gihe abantu bose bakingirwa, ubukungu bwakongera kuzahuka kuko byatuma tudahagarika ibikorwa biteza imbere ubuhinzi".

Soumana avuga ko nyuma yo guterwa urukingo yumvise nta cyahindutse mu mubiri we, kandi ko nta kibazo kuko ngo n’abandi bose barimo Perezida wa Repubulika, Paul Kagame bahawe uru rukingo.

Umukozi w’Ikigo RBC ushinzwe gufasha mu gikorwa cyo gukingira, Dr Sugira Leonce avuga ko kuba abantu bakingiwe bitavuze ko bahita bahagarika ingamba zo kwirinda Covid-19.

Dr Sugira ati "Turasabwa gukomeza kwambara agapfukamunwa, guhana intera no gukaraba intoki kenshi kugeza igihe bizagaragara ko nta Coronavirus igihari(bitangazwa na Minisiteri y’Ubuzima".

Dr Sugira yibutsa abarimo guhabwa urukingo rwa mbere ko nyuma y’iminsi 28 baba bazagaruka guhabwa urukingo rwa kabiri ku butumire bw’inzego zishinzwe ubuzima.

Umuyobozi w’Umujyi wa Kigali, Pudence Rubingisa yakomeje avuga ko mu bindi byiciro bizihutira gukingirwa muri iyi minsi harimo abanyerondo, abubatsi(abafundi n’abayede), hamwe n’abandi bose bakorera ahahurira abantu benshi.

Mayor Rubingisa yakomeje agira ati "Ibyiciro bindi birakomerezaho, murabizi ko mu masoko twagezemo ariko ntabwo twarangije, ubwo (abakingira) naho barahagaruka mu minsi iri imbere".

Kuri uyu wa 13 Werurwe 2021 kandi hakingiwe abacunga umutekano mu bigo byigenga (abasecurité) barenga 1,250, igikorwa cyabereye ahasanzwe habera imurikagurisha i Gikondo.

Mu Gakiriro ka Gisozi naho abakozi ba RBC bakingiye ababaji n’abacuruzi barenga 400, ndetse no mu nyubako ya Kigali Arena hakaba habereye igikorwa cyo gukingira abihaye Imana n’abagize imiryango itari iya Leta(CSOs) barenga 1,233.

Igikorwa cyo gukingira Covid-19 kandi ntabwo cyasize abatwara ibinyabiziga kuva ku bashoferi b’imodoka, abatwara moto n’amagare, kikaba ngo kizagenda gikorwa gake gake kugeza ubwo bose bazakingirwa nk’uko RBC ikomeza ibitangaza.

Kugeza kuri uyu wa gatanu tariki 12 Werurwe 202, abakozi ba RBC bari bamaze gukingira Covid-19 abarenga ibihumbi 249 hirya no hino mu gihugu, aho abarenga ibihumbi 10 bakingiwe kuri uwo munsi wonyine.

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka