Mu kiganiro n’abanyamakuru cyabaye mu ntangiriro ziki cyumweru, Umuyobozi Mukuru wa WHO, Dr. Tedros Adhanom Ghebreyesus, yaburiye ibihugu kutihutira gukuraho ingamba zo kwirinda icyo cyorezo, kuko bishobora gutuma imibare y’abandura yongera kuzamuka.

Yagize ati “Iyi ndwara ni mbi cyane kandi ikomeje kwihinduranya kenshi imbere y’amaso yacu”.

Ibi abivuze nyuma y’uko igihugu cya Danemarike (Denmark), kibaye icya mbere ku mugabane w’u Burayi gikuyeho ingamba zose zijyanye no kwirinda Covid-19, nyamara hakomeje kuvugwa abantu benshi bandura ubwoko bushya bwa virusi ya Omicron.

Umuyobozi wa WHO avuga ko urugero nk’urwo rukurikiwe n’abavuga ko abantu benshi bamaze kwikingiza, bishobora kuba urwitwazo rwo gukuraho ingamba zo kwirinda Covid-19 mu bindi bihungu.

Dr. Tedros avuga ko uko ubwandu bwa Covid-19 bukomeza kwiyongera, bivuze ubwiyongere bw’abapfa bazize icyo cyorezo.

Kuva ubwoko bushya bwa Covid-19 bwuswe Omicro bugaragaraye muri Afurika y’epfo mu byumweru 10 bishize, abantu hafi miliyoni 90 nibo bamaze kuyandura ku isi.

Dr. Tedros avuga ko WHO itagamije gusaba ibihugu gusubiza abaturage babyo mu kato, ahubwo ko icyo igamije ari ukubisaba gufata ingamba zo kurinda abaturage, batagendeye ku nkingo gusa.