Virusi ya COVID-19 imara umwanya ungana ute ku kintu?

Ubushakashatsi buheruka, bugaragaza ko icyorezo cya Covid-19 kimara hagati y’amasaha atatu n’atanu haba ku meza, ku rubaho, kuri pulasitiki (plastic) n’ahandi umuntu wanduye ashobora kuba yakororeye cyangwa yafashe.

Minisitiri w
Minisitiri w’Ubuzima Dr. Daniel Ngamije avuga ko ubushakashatsi buheruka bugaragaza ko virusi ya Covid-19 ishobora kumara ku bintu hagati y’amasaha atatu n’atanu (Photo:Internet)

Ibi biratangazwa mu gihe hirya no hino ku mbuga nkoranyamabaga hakomeje gukwirakwira amakuru atandukanye avuga ku masaha covid-19 imara ku bintu runaka ndetse no mu kirere.

Hari ifoto imaze iminsi icicikana ku mbuga nkoranyambaga ivuga igihe iyi virusi imara ku bintu, aho ngo imara amasaha hagati y’abiri n’umunani ku bikozwe mu cyuma cya aluminiyumu, n’amasaha 48 ku byuma bisanzwe.

Iyo foto kandi igaragaza ko iyi virusi imara iminsi hagati y’ine n’itanu ku mbaho, ibirahuri, pulasitike n’impapuro, naho ku turindantoki (gants) dukoreswa kwa muganga ikamaraho amasaha umunani.

Minisiteri y’Ubuzima, ishingiye kuri raporo iheruka, iravuga ko amakuru ari gucicikana avuga ko icyi cyorezo kimara amasaha umunani mu kirere atari yo kandi ko n’abavuga ko iyi virusi ishobora kumara iminsi ahantu atari yo.

Mu kiganiro kuri telephone, Ministiri w’Ubuzima, Dr. Daniel Ngamije, yagiranye na KT Radio, yatangaje ku gihe iyo virusi imara ku bintu n’ubwo ikiri kwigwaho.

Yagize ati “Ubushakashatsi burakomeje ariko ikizwi ni uko imara amasaha hagati y’atatu n’atanu ku bintu, haba ku rubaho, haba ku meza ku kintu icyo ari cyo cyose umuntu yaba yakororeyeho cyangwa yitsamuriyeho arwaye”.

Minisitiri Dr. Ngamije kandi yanyomoje amakuru avuga ko iyi virusi imara amasaha umunani mu kirere, avuga ko amakuru aheruka avuga ko atari byo.

Yagize ati “Ni ibyo bamwe bari kuvuga ko ishobora kuguma mu mwuka, ariko amakuru ya nyuma ni uko atari byo, ari na cyo gituma tuvuga tuti ‘uri hafi y’umuntu wanduye akaba yakwitsamura cyangwa agakorora amatembabuzi ye ari yo yakwanduza, ariko umwitaruye hejuru ya metero ebyiri ntabwo wandura, kuko ntibiremezwa ko waca ahantu umuntu yitsamuriye cyangwa yakororeye ngo wandure”.

Minisiteri y’Ubuzima kandi irakomeza gushishikariza Abanyarwanda gukomeza kwirinda baguma mu ngo zabo, birinda ingendo zidakenewe, bagerageza guhana intera ndende n’abandi mu gihe basohotse, ndetse no gukaraba kenshi birinda kwikora aho ari ho hose mu maso.

MENYA UMWANDITSI

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka