Inkuru yatangajwe na RTBF iravuga ko u Bubiligi bwamaze kurenza abantu ibihumbi 10 bandura Covid-19 buri munsi ku mpuzandengo y’abantu 10,454 hagati ya tariki 13 na 19 Ukwakira 2020, nk’uko byemejwe n’imibare y’agateganyo yashyizwe ahagaragara n’ikigo gishinzwe ubuzima bw’abaturage (l’Institut de santé publique Sciensano).

Imibare ikaba yazamuwe n’abantu 16,746 babonetse mu masaha 24 yari ashize, ari na wo mubare munini ubonetse w’abanduye Covid-19 mu munsi umwe kuva iki cyorezo cyatangira.

N’ubwo impuzandengo y’ibipimo bifatwa yazamutseho 30%, ubwiyongere bw’abandura bukomeje gutera impungenge kuko bageze kuri 69% ugereranyije n’icyumweru gishize.

Ariko igihangayikishije kurushaho ni umubare w’abarimo kujyanwa mu bitaro urimo kurenga ubushobozi bw’urwego rushinzwe ubuzima kuko kuva muri Mata nibwo mu Bubiligi habonetse ubwandu bushya 498 mu masaha 24, mu gihe baherukaga kugira umubare w’abantu benshi (629) bagiye mu bitaro ku itariki 28 Werurwe 2020 icyorezo kigitangira kubibasira.

Hagati aho kandi abarimo gukira na bo ntabwo ari benshi ugereranyije n’ubwandu buhari, kuko kugeza ku wa Gatanu tariki 23 Ukwakira 2020 abari bamaze gusezererwa bari 269 gusa.

Mu Bubiligi hose abantu barwaye Covid-19 bari mu bitaro kuri uwo munsi bari 3,649 (+11%) na 573 bari mu nzu y’indembe (+9%), barimo ndetse na Minisitiri w’Intebe wungirije Sophie Wilmès akaba na Minisitiri w’Ububanyi n’amahanga.

Amakuru yatangajwe n’ikinyamakuru LEVIF.BE kuwa kane yavugaga ko Minisitiri Wilmès yari arembye ariko uburwayi ngo ntabwo burimo kwiyongera.