Ku wa Gatatu tariki 10 Gashyantare 2021, nibwo Ambasade ya Amerika muri Tanzania yatangaje ko imibare y’abandura Covid-19 muri icyo gihugu irimo kwiyongera cyane, ku buryo amavuriro ashobora kubura ubushobozi bwo kubakira.

Itangazo ryasohowe na Ambasade ya Amerika iri i Dar es Salaam muri Tanzaniya, rivuga ko iyo Ambasade yatangiye kubona ikibazo cy’ubwiyongere bw’imibare y’abandura Covid-19 guhera muri Mutarama uyu mwaka.

Rigira riti “Ingamba zo kugabanya no gukumira Covid-19 muri Tanzania kugeza ubu ziracyari nkeya cyane, ku buryo amavuriro ashobora guhura n’ikibazo cyo kubura ubushobozi bwo kwita ku barwayi kubera ubwinshi bwabo”.

Perezida wa Tanzania Dr John Pombe Magufuli yakunze kumvikana agaragaza intege nke ashyira mu bikorwa byo guhangana n’iki cyorezo. Aherutse kubwira abaturage be, ko batagomba kuzemera urukingo rwa Covid-19, kandi ko n’igihugu kidakeneye kujya muri gahunda ya ‘Guma mu Rugo’ kuko Imana ari yo izabarinda.

Perezida Magufuli yabwiye abaturage be ko gukoresha ibintu gakondo, nko kwiyuka byaba byiza kurusha izo nkingo z’abanyamahanga.Tanzania yahagaritse gutangaza amakuru ajyanye na Covid-19 guhera muri Mata 2020.

Ambasade ya Amerika ntiyatangaje imibare igaragaza ubwo bwiyongere bw’abandura Covid-19 muri Tanzania, ariko yavuze ko ubushobozi bukeya bw’ibitaro by’aho muri Tanzania, bushobora gutuma ubuzima bw’abarwayi bujya mu kaga, bitewe n’uko ibitaro byananiwe gutanga ubuvuzi bwihuse.