Seychelles: WHO igiye gukurikirana impamvu abahawe inkingo zombi za Covid-19 bakomeje kwandura ari benshi

Minisitiri w’ubuzima wa Seychelles yatangaje ko kimwe cya gatatu (1/3) cy’abapimwe bagasanga bafite Covid-19 mu cyumweru gishize, bari baramaze gukingirwa inkingo zombi zisabwa kugira ngo umuntu abe akingiwe byuzuye, Ishami ry’Umuryango w’Abibumbye ryita ku buzima (WHO) rikaba rigiye kubikurikirana.

WHO yatangaje ko ririmo gusubiramo raporo ijyanye n’amakuru yerekeye Coronavirus aturuka muri Seychelles, nyuma y’uko Minisitiri w’Ubuzima muri icyo gihugu atangarije ko 1/3 cy’abasanzwe banduye Covid-19 mu cyumweru gishize, bari baramaze guhabwa inkingo zombi.

Minisiteri y’Ubuzima yo muri Seychelles ndetse na WHO, ku wa Kabiri tariki 11 Gicurasi 2021, bahamije ko umubare munini w’abo basanganye Covid-19 mu cyumweru gishize, ari abatarakingirwa, cyangwa se abamaze kubona urukingo rumwe gusa. Ikindi kandi ngo muri abo basanze banduye Covid-19 kandi baramaze kubona inkingo zose, ntawe yishe kandi ntibanarembye cyane, ahubwo usanga abatarabona inkingo ari bo barembye cyane.

WHO yatangaje ko ubu irimo gukurikirana uko ibintu bimeze kuri icyo Kirwa giherereye mu Nyanja y’u Buhinde, kikaba gituwe n’abaturage bafi 100.000, kandi kuva icyorezo cya Covid-19 cyakwaduka ku isi, nta raporo buri munsi ituruka kuri icyo kirwa yagaragazaga ko abandura atari benshi cyane.

Mu byo Umuvugizi wa WHO yabwiye ibiro ntaramakuru ‘Reuters’ yagize ati “Amatsinda yacu arimo gucukumbura amakuru yerekeranye na Covid aturuka muri Seychelles, no kureba uko ibintu bigenda bihinduka kugira ngo dusobanukirwe neza uko ikibazo giteye”.

Mu itangazo ryasohowe na Minisiteri y’Ubuzima muri Seychelles ku wa mbere tariki 10 Gicurasi 2021, ryagaragaje ko imibare y’abandura Covid-19 yiyongereye ikava ku bantu 120 bari bahari banduye ku itariki 30 Mata 2021, bakagera kuri 314 ku itariki 8 Gicurasi 2021.

Ikindi kivugwa muri iryo tangazo ni uko 2/3 by’abo banduye Covid-19 mu cyumweru gishize, bari barahuye n’abayirwaye na bo bagahita bandura. Muri iryo tangazo bakomeza bavuga ko 37% by’abo banduye Covid-19 mu cyumweru gishize bari barahawe inkingo zose.

Abagera kuri 57 % by’abo banduye Covid-19 mu cyumweru gishize, ngo bari barahawe urukingo rwa Covid-19 rwa Sinopharm, mu gihe abagera kuri 43 % bo bahawe urwa AstraZeneca. WHO ivuga ko hafi 60% by’abaturage ba Seychelles bamaze guhabwa inkingo inshuro ebyiri.

WHO kandi yavuze ko ubushakashatsi ku rukingo rwa ‘Sinopharm’ bwagaragaje ko umuntu wakingiwe inshuro ebyiri zarwo, aba afite ubwirinzi bwa 79 % nyuma y’iminsi 14 kuzamura.

AstraZeneca yo muri Werurwe yatangaje ko urukingo rwayo rwa Covid-19 rutanga ubwirinzi bwa 76 %.

WHO yameje ko urukingo rwa Sinopharm rwakoreshwa mu gukingira Covid-19 kuko rwemewe, ndetse rukaba rwemerewe kongerwa mu zikoreshwa muri gahunda ya COVAX, (Gahunda yo gukusanya inkingo zigenewe guhabwa ibihugu bikennye).

Muri rusange abamaze kwandura Covid-19 kuva yagera muri Seychelles ni abantu 8. 200, imibare y’abandura iriho izamuka kandi ikaba ihangayikishije nk’uko bitangazwa na Minisiteri y’ubuzima yaho.

WHO ivuga ko gukingirwa byonyine bidahagije mu guhagarika ikwirakwira rya Covid-19, kandi ibyo byatangajwe na Minisiteri y’Ubuzima mu Rwanda, gukingirwa ngo ntibihagarika izindi ngamba zo kwirinda, ni ukuvuga ko na nyuma yo gukingirwa, abantu ngo bagomba gukomeza kubahiriza ibyo guhana intera, kwambara udupfukamunwa, gukaraba intoki neza kandi kenshi n’izindi.

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka