Umwe muri bo witwa Mushimiyimana Emmanuel w’imyaka 17 y’amavuko yitabye Imana tariki 2/01/2014 abandi basigara baruka bakanacibwamo ku buryo buteye inkeke.

Amakuru aturuka mu murenge wa Muyira aravuga ko abaturage bose banyoye kuri icyo kigage harimo na Ntagishyika Augustin ariwe nyir’urwo rugo cyanywerewemo kimwe n’umuryango we bazanwe mu bitaro bya Nyanza bagaragaza ibimenyetso byo gucibwamo no kuruka.

Icyakora ngo uwihishe inyuma y’ubu bugizi bwa nabi agahumanya icyo kigage banyoye ku bunani yakomeje kubabera urujijo kuko mu bagaketswe ari nyir’urwo rugo n’umuryango we bose bararembye akaba ariyo mpamvu bavuga ko cyahumanyijwe n’undi muntu utaramenyekana.

Ubwo batangiraga kumererwa nabi cyane abaturage banyoye kuri icyo kigage baherewe ubutabazi bw’ibanze ku kigo nderabuzima cya Nyamure ariko ibintu bikomeje kuzamba boherezwa mu bitaro bya Nyanza aho tariki 4/01/2014 bari abantu 56 bakomeje kwitabwaho n’abaganga.

Muyombana Déo umukuru w’umudugudu wa Bugina icyo kigage cyanywerewemo avugana na Kigali Today yatangaje ko ingo nyinshi zo muri uwo mudugudu zafunze imiryango kubera ubwo burwayi bwatumye bene zo bajyanwa mu bitaro.

Yagize ati: “Ikigage biracyekwako cyahumanyijwe gitetswe cyangwa amasaka yacyo akaba ariyo yakumanyijwe kuko n’uwakinyoyeho kitarajyamo umusemburo nawe yafashwe no kuruka anacibwamo”.

Uyu muyobozi w’umudugudu nawe urwarije abo mu muryango we mu bitaro bya Nyanza akomeza avuga ko iki gikorwa cyihishwe inyuma n’umugizi wa nabi washakaga koreka umudugudu wose ku munsi mukuru w’Ubunani bw’umwaka wa 2014.

Ati: “N’uko Imana yakinze ukuboko benshi baba barahitanwe na kiriya kigage kuko mu gihe twari tukijijinganya umwe yahise atuvamo arapfa”.

Abaforomo bo mu bitaro bya Nyanza bakomeje kwitaho iyo mbaga y’abaturage bafashwe n’ubwo burwayi baganira na Kigali Today bavuze ko bafite icyizere ko baza gukira.

Dr Guaillain Lwesso umuyobozi w’agateganyo w’ibitaro bya Nyanza ku murongo wa telefoni ye igendanwa twavuganye nawe arimo kujya aho ibyo byabereye ngo hafatwe icyo kigage gipimwe maze hamenyekane niba koko cyari gihumanye.

Mu karere ka Nyanza ubwo hizihizwaga umunsi mukuru w’ubunani tariki 01/01/2014 hirya no hino hakomeje kuvugwa benshi mu bahumaniye mu biribwa bahawe ndetse n’ibyo banyoye kuko mu murenge wa Nyagisozi muri aka karere umukobwa witwa Niyigena Beatha nawe yitabye Imana tariki 02/01/2014 hakekwa ko ibiryo yazimaniwe n’inshuti ye yaba yarabihumanyije.

Jean Pierre Twizeyeyezu