KT TV
Mu Rwanda hamaze kugaragara abanduye MPox bane - MINISANTE
Minisiteri y’Ubuzima mu Rwanda (MINISANTE) iratangaza ko abanduye indwara y’ubushita bw’inkende (MPox) mu Rwanda ari bane, babiri bakaba baramaze kuvurwa bagakira bagasezererwa mu bitaro, abandi babiri bakaba bagikurikiranwa n’abaganga.
Minisiteri y’Ubuzima itangaza ko abanduye bose bari baragiriye ingendo hanze y’Igihugu, ubu hakaba hari gukurikiranwa ubuzima bw’abo bahuye nabo kugira ngo hirindwe gukwirakwiza ubwo bwandu.
Amakuru yashyizwe ku rubuga rwa X rwa MINISANTE kuri uyu wa 16 Kanama 2024, avuga ko inzego z’ubuzima ziri gukurikirana ku mipaka y’Igihugu no mu Gihugu imbere ngo zikumire ubwanda bwa MPox, ikaboneraho no guhumuriza Abanyarwanda kudakuka umutima.
MINISANTE isaba Abanyarwanda gukurikiza amabwiriza yo kwirinda Ubushita bw’Inkende, barushaho kugira isuku ihagije no kwirinda gukora ku wanduye ubwo burwayi.
Iyi ndwara yandura cyane binyuze mu gukora ku muntu uyirwaye cyangwa amatembabuzi y’urwaye. Ishobora kwandura kandi mu buryo bw’imibonano mpuzabitsina, gusomana cyangwa gusuhuzanya n’ufite ubwo burwayi.
Ibimenyetso byayo ni ukugira ibiheri ku mubiri biryaryata bikunze gufata imyanya ndangagitsina, mu maso, mu biganza no mu maguru. Ibindi bimenyetso ni kugira umuriro, kubabara umutwe, kuribwa mu ngingo no kugira amasazi.
Ibitekerezo
Ohereza igitekerezo
|
|
