MINISANTE ihumuriza abatinya urukingo rwa Covid-19

Dr Mpunga yabigarutse ubwo yari mu kiganiro kuri RBA kuri uyu wa 7 Gshyantare 2021, akavuga ko inkingo u Rwanda ruzatanga zemewe n’Ishami ry’Umuryango w’Abibumbye ryita ku Buzima (OMS), zikazafasha abazazihabwa kwirinda icyorezo cya COVID-19.

Kuba hari abarwara kandi barahawe inking, Dr Mpunga avuga ko bishoboka, ati; “Ubusanzwe urukingo rukenera doze ebyiri kandi zitangwa mu bihe bitandukanye, igikwiye kurebwa ni ukumenya niba umuntu yandura mbere yo guhabwa urukingo, cyangwa nyuma yo gufata doze imwe. Gusa icyo twavuga ni uko urukingo rufasha umubiri gukora abasirikare bahangana na ya virusi yinjira mu mibiri w’uwahawe urukingo”.

Akomeza avuga ko iyo virusi yinjiye mu mubiri y’uwahawe urukingo, umubiri uyitsinda kandi bimufasha kutanduza abandi.
Ati “Urukingo ntirubuza abantu kwandura, ariko iyo urwaye ukingiwe ntuzaremba, uzakira kandi ntiwanduza”.

U Rwanda ruteganya kwakira inkingo za COVID-19 za mbere zo mu bwoko bwa ‘Phizer’ zibarirwa mu bihumbi 102, naho mu mpeza z’ukwezi kwa Gashyantare rwakire izindi nkingo zo mu bwoko bwa ‘AstraZenica’ ibihumbi 996.

Ni inkingo zizahabwa abakora mu nzego z’ubuzima, abakuze bafite indwara karande hamwe n’abakora mu nzego z’umutekano kuko nabo bakunze kugarizwa n’icyo cyorezo.

U Rwanda ruri mu bihugu bine ku mugabane wa Afurika byiteguye kubona inkingo no kuzitanga, ndetse kuva tariki ya 6 Gashyantare 2021 indege ya Ethiopian Airlines yagejeje inkingo za mbere ku mugabane wa Afurika zikuwe mu gihugu cy’Ubushinwa.

u Rwanda rufite gahunda yo kugura n’izindi nkingo zizahabwa abaturage, u Rwanda ruteganya ko umwaka wa 2021 ukazarangira nibura 60% by’abanyarwanda bakingiye, ibikorwa bizasaba Leta agera kuri miliyoni 124 z’Amadolari ya Amerika.
Leta y’u Rwanda ivuga ko ayo mafaranga azakoreshwa azagura inkingo n’ibindi bikenerwa bigendanye na zo, ikaba ari gahunda y’ikingira ry’icyo cyorezo mu gihe cy’imyaka ibiri, bikaba biteganyijwe ko abantu miliyoni umunani (8) bazaba bakingiwe.
Biciye muri Covax, ibihugu byose hatitawe ku bukungu bwabyo, bifite uburenganzira bungana bwo kubona inkingo mu gihe zizaba zabonetse, intego ikaba ari uko mbere y’uko uyu mwaka wa 2021 urangira haba habonetse miliyari ebyiri z’inkingo.

MENYA UMWANDITSI

Sylidio Sebuharara

Umunyamakuru

@ sebuharara

Reba inkuru zose nanditse ( 1631 )