Nk’uko tubikesha urubuga www.worldometers.info/coronavirus/, rubonekaho imibare y’abamaze kwandura icyo cyorezo, abagikize ndetse n’abamaze guhitanwa na cyo, bigaragara ko imibare yakomeje kuzamuka uko iminsi ishira.

Mu ntangiriro z’ukwezi gushize kwa Gicurasi 2020, abanduye icyo cyorezo hirya no hino ku isi bageraga kuri Miliyoni enye zirenga gato, ariko uyu munsi imibare yarazamutse ubu abamaze kucyandura bagera kuri Miliyoni esheshatu zirenga.

Ku rubuga www.ecdc.europa.eu, bavuga ko uhereye ku itariki 31 Ukuboza kugeza ku itariki ya 6 Kamena 2020, imibare yazamutse ku migabane n’ibihugu bitandukanye by’isi, ubu abamaze kwandura Coronavirus barasaga miliyoni esheshatu, kikaba kimaze guhitana abagera hafi ku bihumbi magana ane.

Ku mugabane w’Afurika hamaze kuvugwa abanduye bagera kuri 177.209, ibihugu 5 biza ku isonga mu kugira umubare munini w’abanduye icyo cyorezo ni Afurika y’Epfo ifite abagera ku 43,434 ,icya kabiri ni Misri (Egypt) ifite abagera 31,115,icya gatatu ni Nigeria ifite abanduye bagera ku 11 844, icya kane ni Algeria ifite abanduye bagera ku 9,935, icya gatanu kikaba Ghana ifite abanduye bagera ku 9,168.

Imibare y’abamaze guhitanwa n’icyo cyorezo ku mugabane wa Afurika muri rusange ubu bagera ku 4 913, ibihugu 5 biri imbere mu gupfusha abantu, ni Misri ‘Egypt’ (1 166), Afurika y’Epfo (908), Algeria (690), Nigeria (333) na Sudan (333).

Ku mugabane wa Aziya abanduye bagera kuri 1 277,558, ibihugu 5 biza ku isonga ni Ubuhinde (236,657), Turkiya (168,340), Iran (167,156), Saudi Arabia (95 748) na Pakistan (93 983).Ibi bigaragaza ko mu Bushinwa hatakiri umubare munini w’abarwaye Coronavirus nubwo ari ho yahereye.

Imibare y’abamaze guhitanwa n’icyo cyorezo ku mugabane wa Aziya ni 32 835. Ibihugu 5 biri imbere mu gupfusha abantu benshi ni Iran (8 134), Ubuhinde (6 6742), Ubushinwa (4 638), Turkiya(4 648) na Pakistan (1 935).

Ku mugabane w’Amerika, abanduye bagera kuri 3 206 492, ibihugu 5 biza ku isonga mu kugira umubare munini ni Leta zunze ubumwe z’Amerika (1 897 838), Brazil (614 941), Peru (187 400), Chile (122 499) na Mexique (110 026).

Imibare y’abamaze guhitanwa n’icyo cyorezo ku mugabane w’Amerika ni 178 273.Ibihugu 5 bimaze gupfusha umubare munini w’abantu kurusha ibindi ni Leta zunze ubumwe z’Amerika(109 143), Brazil (34 021 ), Mexique (13 170), Canada (7 703) na Peru (5 162).

Ku mugabane w’Uburayi abamaze kwandura Covid 19 muri rusange ni 2 035 331. Ibihugu 5 biza ku isonga mu kugira umubare munini w’abanduye ni Uburusiya (449 834), Ubwongereza (283 311), Espagne (240 978), Ubutaliyani (234 531) n’Ubudage(183 678).

Abamaze guhitanwa n’icyorezo cya Coronavirus ku mugabane w’Uburayi bagera ku 177 908. Ibihugu 5 bimaze gupfusha umubare munini w’abantu bazize icyo cyorezo ni Ubwongereza (40 261), Ubutaliyani (33 774), Ubufaransa (29 111), Espagne (27 134) n’Ububiligi (9 566).

Ku mugabane wa Oseyaniya ‘Oceania’:Abanduye icyo cyorezo muri rusange bagera ku 8 705.Ibihugu 5 Biza ku isonga mu kugira umubare munini w’abanduye icyoi cyorezo ni Australia (7 240), New Zealand (1 154), Guam (179), French Polynesia (60) na ‘Northern Mariana Islands’ (26).

Abamaze guhitanwa n’icyo cyorezo ku mugabane wa ‘Oceania’ ni 131. Ibihugu 4 bimaze gupfusha abantu benshi ni Australia (102), New Zealand (22), Guam (5) na Northern Mariana Islands (2). Iyi mibare dukesha www.ecdc.europa.eu ni iy’uyu munsi tariki ya 6 Kamena,twibutsa ko imibare ihinduka umunsi ku wundi.

Nk’uko tubikesha urubuga https://www.worldometers.info/coronavirus/, imibare y’abamaze kwandura Coronavirus ku isi hirya no hino kugeza uyu munsi tariki 6 Kamena 2020, bagera kuri 6,876,347, abamaze kuyikira ni 3,370,044 mu gihe abamaze guhitanwa nayo ari 398,702.

Mu Rwanda kugeza ku wa Gatandatu tariki 06 Kamena 2020, abamaze kwandura icyo cyorezo ni 431, abamaze kugikira ni 283, kikaba kimaze guhitana abantu babiri(2).

Mu bihugu bituranye n’u Rwanda, muri Uganda abamaze kwandura icyo cyorezo bari 557 mu gihe abari bamaze kugikira ari 82.

Muri Congo abamaze kucyandura ni 635,abamaze gukira ni 182 mu gihe kimaze guhitana abagera kuri 20.

Tanzania nubwo yasaga n’itahaye agaciro ingamba zo kwirinda, kugeza ubu ifite abamaze kwandura icyo cyorezo bagera kuri 509, abamaze kugikira bagera ku 183 mu gihe kimaze guhitana abagera kuri 21.

Mu Burundi abamaze kwandura icyo cyorezo ni 63, abamaze kugikira ni 33 mu gihe kimaze guhitana umuntu umwe(1).

Gusa imibare ya bimwe mu bihugu ishidikanywaho, kuko hari ibivugwaho kwirengagiza no gutangaza imibare itari yo bitewe n’impamvu zitandukanye.