Buri Kagari kahawe moto imwe, hanatangizwa ubukangurambaga bugamije kurwanya ikwirakwira rya Covid-19.

Ubu bukangurambaga bwatangirijwe muri gare ya Nyabugogo, na ho moto zatanzwe zikaba zifite indangururamajwi zizajya zifashishwa muri ubwo bukangurambaga.

Iragena Eric, uhagarariye abikorera mu Murenge wa Kimisagara, yavuze ko izo moto zatanzwe kugira ngo na bo batange umusanzu wabo mu rugamba rwo kurwanya Covid-19, na cyane ko nk’abacuruzi yabagizeho ingaruka nyinshi.

Ati “Turashimira ubuyobozi bw’umurenge ko mutajya mwihererana imihigo nk’iyi, ahubwo mukayidusangiza tukajyanamo mu ngamba tugafatanya mu kurwanya Covid-19”.

Arongera ati “Ntabwo natinda cyane ku ngaruka za Covid-19, by’umwihariko nk’abacuruzi turazizi. Ibikorwa bitandukanye twakoreye aha birimo no gutanga izi moto, ni uburyo bwo kugira ngo dufatanye kuyirwanya, kandi rwose turi kubikora neza”.

Umunyamabanga Nshingwabikorwa w’Umurenge wa Kimisagara, Kalisa Jean Sauveur, yavuze ko izi moto zatanzwe zigiye kunganira ingamba zisanzweho zo kurandura Covid-19 muri uwo murenge.

Avuga ko zizorohereza abasanzwe batanga ubutumwa bakoresheje indangururamajwi, ubusanzwe bagendeshaga amaguru urugo ku rundi bakaba bananirwa.

Ati "Izi moto ni igikoresho kiramba. Tugiye kujya tuzikoresha aho kugira ngo umuntu agende n’amaguru afite indangururamajwi urugo ku rundi avuga”.

Akomeza agira ati “Moto ni igikorwa remezo kizajya kigera ahantu hose kandi mu buryo bwihuse ndetse zizajya zinadufasha mu bindi bikorwa bisanzwe biteza imbere abaturage”.

Mu gutangiza ubu bukangurambaga, muri gare ya Nyabugogo hanasibuwe ibimenyetso bifasha abantu guhana intera, hasigwa amarangi mu mbuga aho abagenzi bahagarara bategereje imodoka, ndetse no ku modoka zitwara abagenzi.

Moto zahawe utugari zose hamwe zatwaye amafaranga abarirwa muri miliyoni eshanu z’Amafaranga y’u Rwanda.