Nyuma ya Kongo Kinshasa hafi y’u Rwanda, Kenya na yo yatangaje ko hagaragaye umurwayi wa Coronavirus, uyu akaba yari umunyeshuri muri Leta zunze ubumwe za Amerika, wavuyeyo akabanza kunyura mu Bwongereza.

Umunyamabanga wa Leta muri Kenya ushinzwe ubuzima, Mutahi Kagwe, yavuze ko uwo munyeshuri w’igitsina gore yageze muri Kenya abanza gushyirwa mu kato, kandi ko atarimo kuremba.

Kagwe avuga ko Leta irimo gushakisha abantu bose bahuye n’uwo murwayi wa Coronavirus mbere yo gushyirwa mu kato.

Kugeza ubu, uwo mukobwa ari mu Bitaro byitiriwe Kenyatta biri i Nairobi.

Mu gitondo cyo kuri uyu wa gatanu tariki 13 Werurwe 2020, isi yose yari imaze kugira abarwayi ba Coronavirus barenga ibihumbi 135, ndetse n’abapfuye bazira icyo cyorezo bakabakaba 5000, kuva aho Coronavirus cyakwaduka mu ntangiriro z’uyu mwaka.

Icyakora hari abarenga ibihumbi 70 bamaze gukira icyo cyorezo cyageze mu bihugu birenga 127 kuri uyu wa gatanu.

Ibihugu bitandukanye bikomeje gufata ingamba zo gukumira abinjira muri byo bavuye ahantu hazahajwe na Coronavirus, ndetse no kubuza abenegihugu kujyayo.

Hari n’ibigeze aho bisaba abaturage babyo kuguma mu ngo, abakozi bagakoresha ikoranabuhanga, umuntu agasohoka gusa ari uko agiye guhaha ibiribwa niba atarahunitse.