Abo bageze mu za bukuru, bakingiriwe mu macumbi yabo kuko bavuga ko badafite imbaraga zo kugera ku bigo nderabuzima aho icyo gikorwa cyari kirimo kubera muri rusange.

Bamwe mu bakuze bahawe urukingo bavuga ko batari bafite ikizere cyo kurubona kubera intege nke, ariko bashima ko inkingo zabasanze mu macumbi.

Abo mu Karere ka Rusizi bavuga ko bashima Perezida Kagame watumye bashobora kubona inkingo mu ba mbere “Turashima Perezida Kagame wadutekerejeho natwe tukaba tubonye urukingo, kubera intege nke ntitwari twizeye kurubona ariko abaganga bazituzaniye aha dutuye”.

Umwe mu bakingiwe avuga ko bishimiye kubona urukingo kuko bibaha ikizere cyo kutazandura icyorezo cya Covid-19.

Kuva tariki ya 5 Werurwe 2021 mu Rwanda batangiye ibikorwa byo gukingira abakora muri serivisi z’ubuzima, abafite indwara zidakira, abakuze n’abagira uruhare mu bikorwa byo gukumira icyorezo cya Covid-19.

Si ibikorwa byagarukiye ku bakora muri serivisi z’ubuzima gusa kuko abakora muri serivisi z’umutekano, abakora muri serivisi zibahuza n’abantu benshi nk’abarimu, abanyamakuru n’abandi bahawe urukingo.

Abo bakecuru n’abasaza b’Intwaza, bavuga ko bazakomeza kwirinda icyo cyorezo nubwo bahawe urukingo, kuko ngo babwiwe ko gukomeza kwirinda ari ngombwa.

Mu minsi ibiri ishize y’igikorwa cyo gukingira abaturage Covid-19 hirya no hino mu gihugu, hamaze gukingirwa abantu 158, 898.