Muri icyo gikorwa cyo kuzigeza mu turere, i Huye kuri uyu wa Kane tariki 4 Werurwe 2021 hageze inkingo 11,000 zikaba ari iz’Akarere ka Huye n’aka Gisagara.

Izo nkingo zose ni izo mu bwoko bwa AstraZeneca, Akarere ka Huye kakaba kagenewe 5,500 ndetse n’aka Gisagara gahabwa 5500.

Kajugujugu yazanye izo nkingo yazanye n’izo mu Karere ka Nyaruguru 5,382, izo mu ka Ngororero 5,500 n’izo mu ka Nyamagabe 5,500.

Umuyobozi mukuru w’ibitaro bya Kibilizi, Dr. Jean de Dieu Twizeyimana, avuga ko inkingo bakiriye bagiye guhita bazigabanya ibigo nderabuzima, hanyuma ejo ku wa Gatanu no ku wa Gatandatu tariki 5 na tariki 6 Werurwe 2021, bazatangire gukingira haherewe ku bakora mu rwego rw’ubuvuzi kuko bakunze guhura n’abantu benshi harimo n’abarwaye Coronavirus.

Dr. Twizeyimana anavuga ko abantu bazakomeza gukingirwa haherewe ku byiciro by’abahura n’abantu benshi, ku buryo muri Kamena 2022 Abanyarwanda 60% bazaba baramaze gukingirwa indwara ya Coronavirus, nk’uko byatangajwe na Minisiteri y’Ubuzima.

Musanze

Mu bitaro bikuru bya Ruhengeri hamaze kugezwa inkingo za Covid-19 zigera ku bihumbi 10,500.

Ku isaha ya saa munani z’amanywa yo kuri uyu wa Kane tariki 4 Werurwe 2021, ni bwo imodoka zitwaye inkingo 10,500 za Covid-19 zivuye i Kigali, zari zigeze mu Bitaro bikuru bya Ruhengeri.

Umuyobozi mukuru w’ibyo bitaro, Dr Muhire Philibert, yavuze ko inkingo ibi bitaro byakiriye zigomba guhita zikwirakwizwa mu bigo nderabuzima 16 byo mu Karere ka Musanze bikorana n’ibitaro bikuru bya Ruhengeri.

Igikorwa cyo kuzakira cyanitabiriwe n’abahagarariye Ibigo nderabuzima, Guverineri w’Intara y’Amajyaruguru, Gatabazi JMV akaba yasabye abo bireba kuzifata neza kandi igihe bazaba bakingira bakazarangwa na serivisi nziza. Yijeje abaturage k’uko inkingo zizagenda ziza ari nako bose bazajya bakingirwa.

Dr Muhire yatangaje ko abateganyijwe gukingirwa bamaze kumenyeshwa bose, bityo ko igikorwa bizeye ko kizagenda neza.
Ikindi yasabye abaganga bazakingira ni ukuzirinda kuzisesagura kuko byagira ingaruka zo gutuma umubare uteganyijwe w’abagomba gukingirwa utagerwaho.

Biteganyijwe ko igikorwa cyo gukingira abaturage Covid-19 kizatangira ejo ku wa Gatanu kigakomeza no kuwa Gatandatu.

Gakenke

Mu Karere ka Gakenke naho inkingo zihageze ku gicamunsi cyo kuri uyu wa Kane zizanywe n’imodoka.

Umuyobozi w’Akarere ka Gakenke, Nzamwita Deogratias yavuze ko bakiriye inkingo 5,500 ku bitaro bya Nemba, ariko ko imodoka ziri mu nzira zizigeza mu bigo nderabuzima aho mu gitondo zitangira guhabwa abaturage bagomba gukingirwa ku cyiciro cya mbere.

Ngororero

Ibitaro bya Muhororo byo mu Karere ka Ngororero bimaze kwakira inkingo 5,500 za Covid-19 za AstraZeneca zazanwe na Kajugujugu mu rwego rwo kubungabunga ubuziranenge bwazo.

Umuyobozi w’ibitaro bya Muhororo yashimiye icyo gikorwa kuko hari hari impungenge z’uko inkingo zahura n’ibibazo mu kuzitwara mu mudoka zikaba zakwangirika.

Avuga ko muri zone y’ibitaro bya Muhororo hashyizweho site umunani ku bigo nderabuzima ku buryo kuri uyu wa Gatanu saa mbiri za mu gitondo igikorwa cyo gukingira ibyiciro byabaruwe kiraba gitangiye kandi cyateguwe neza.

Avuga ko izi nkingo zihita zerekeza ku bigo nderabuzima kandi ko hateguwe uburyo zigerayo zitangiritse.

Ruhango

Mu Karere ka Ruhango bakiriye inkingo 5,500 zo mu bwoko bwa AstraZeneca zigiye kwifashishwa gukingira abaturage bamaze kwibaruza. Izo nkingo zahise zitangira kwerekezwa ku bigo nderabuzima aho kuri uyu wa Gatanu tariki 5 Werurwe 2021 zitangira guhabwa abaturage.