Imibare mishya y’abafite SIDA izamenyekana muri Kamena 2019

Abaturarwanda ibihumbi 30 barimo gupimwa agakoko gatera SIDA mu ngo 10,800, bakazatuma hamenyekana umubare mushya w’abafite ubwo bwandu mu gihugu hose.

Ministiri w
Ministiri w’Ubuzima, Dr Diane Gashumba hamwe n’Umuyobozi wa Kaminuza ya Columbia, Lee C Bollinger utera inkunga ibikorwa by’ubuvuzi mu Rwanda

Byatangajwe n’abahagarariye umushinga ICAP wa Kaminuza ya Columbia muri Amerika ukorana n’u Rwanda muri gahunda zitandukanye zo kwita ku buzima.

Kuva mu mwaka wa 2015 imibare yakomeje kuvugwa y’abafite ubwandu bw’agakoko gatera SIDA mu Rwanda ni 3%.

Ubushakashatsi bwiswe (Rwanda Population Based HIV Impact Assessment, RPHIA) bwa ICAP na Ministeri y’Ubuzima, bwatangijwe mu kwezi k’Ukwakira 2018, buzatangazwa mu kwezi kwa Kamena k’uyu mwaka.

Umukozi wa ICAP-Rwanda ushinzwe gutangazama amakuru, Agnes Iraguha agira ati “Imibare izasohoka izasimbura iyo twari dusanganywe”.

“Abakorerwaho ubushakashatsi bagize amahirwe kuko nta ngendo bakoze, barapimirwa virusi itera SIDA mu ngo iwabo hamwe n’indwara y’umwijima”.

Iraguha avuga ko abapimwa bagasanga baranduye bahabwa urwandiko rufasha ibigo nderabuzima gukurikirana ubuzima bwabo.

Umwe mu bayobozi ba ICAP ku rwego mpuzamahanga, Jessica Justman avuga ko kuva mu myaka 16 uyu mushinga umaze ukorera mu Rwanda, hari impinduka zikomeye zigaragara.

Abayobozi ba Kaminuza ya Columbia na ICAP, ndetse na Ministiri w
Abayobozi ba Kaminuza ya Columbia na ICAP, ndetse na Ministiri w’Ubuzima w’u Rwanda bunamiye Abatutsi bazize Jenoside baruhukiye ku Gisozi

ICAP ivuga mu mafaranga y’u Rwanda arenga miliyari imwe yakoresheje muri icyo gihe cyose, ngo yatumye ibigo nderabuzima byiyongera kuva kuri 20 kugera ku birenga 500 byose byita ku bafite ubwandu bwa SIDA.

Umuyobozi wa Kaminuza ya Columbia, Lee C Bollinger ukubutse mu rugendo rw’iminsi itatu yagiriraga mu Rwanda, yizeza ko ubufatanye bafitanye n’u Rwanda buzakomeza kwiyongera.

Ati “Dufite gahunda zitandukanye muri Columbia byumwihariko iza ICAP zijyanye no kwirinda SIDA no gutanga imiti, imikoranire dufitanye n’u Rwanda irakomeye kandi twizera ko izakomeza kwiyongera”.

Lee Billinger n’itsinda bazanye mu Rwanda basuye urwibutso rwa Jenoside rwa Kigali, aho batangarije ko bigoye kwiyumvisha uburyo u Rwanda rwavuye mu bihe bibi rukabasha gutera imbere.

MENYA UMWANDITSI

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.