Bakundukize aremerewe n’ibibyimba biri ku maboko ye

Umuryango wa Bakundukize utuye mu mudugudu wa Buvano, akagari ka Busoro, umurenge wa Nyamyumba mu karere ka Rubavu.

Bakundukize Ruth ufite imyaka 39 amaranye imyaka 32 uburwayi bumeze nk’ibibyimba ku maboko, bwamufashe afite imyaka irindwi bukagenda bwiyongera ariko kugeza ubu akaba atarabona ubuvuzi.

Ni uburwayi bwafashe ku maboko ye aho hiyongereyeho inyama igenda itendera ikaba imuremereye kuko yatumye atajya mu ishuri, ubu akaba atabasha kuva mu rugo kubera uburemere bw’izo nyama ziri ku maboko.

Avuga ko ahantu hakomeye yivuje ari ku bitaro bya Rubavu bitashoboye kugira icyo bitanga, akagana inzira ya kinyarwanda na ho hatamuvuye ahubwo hakabatwara imitungo.

Bakundukize ubu wiyicariye iwabo atunzwe na nyina umubyara na we utishoboye, yamaze kwiyakira kubera ubu burwayi amaranye igihe, icyakora avuga ko akeneye ubufasha bwa Leta n’abagiraneza kugira ngo avurwe.

Yagize ati “Ubufasha bwo kwivuza ndabukeneye, mama ntabushobozi afite naramuhombeje, ku buryo yigeze gutanga amafaranga yari afite tugira inzara, ubu ndaremerewe, nifuza ko umuganga yagikuraho iki kintu, nkeneye ubufasha kuri Leta kugira iruhure mama, kandi n’undi wese yamfasha”.

Bakundukize avuga ko akeneye abamuhumuriza n’abamugemurira, kuko abo basenganaga bamubaga hafi bamutaye akaba ari mu bwigunge.

Mu gushaka kumenya imiterere y’uburwayi bwa Bakundukize, n’indwara nyir’izina arwaye, Kigali Today yaganiriye n’ubuyobozi bw’ibitaro bya Rubavu, byemeza ko byigeze kumwakira, ariko bigasanga uburwayi bwe bwararengeranye ku buryo butakira.

Umuyobozi w’ibitaro bya Rubavu Lt. Col. Dr. William Kanyankore, avuga ko uyu murwayi ibitaro bimuzi, ariko ko basanze iyi ndwara afite idakira, ahubwo asaba ko abagiraneza bafasha umuryango.

Umuryango wa Bakundukize ukeneye gufashwa kuko wagiye mu bukene kubera uburwayi bwe

Agira ati “Twaramubonye turamukurikirana, ariko dusanga ayimaranye igihe ku buryo itavurwa ngo ikire. Ahubwo twasaba abagiraneza gufasha umuryango we kuko uremerewe”.

Indwara Bakundukize Ruth arwaye mu ndimi z’amahanga yitwa ‘Neurofibromatosis’ ikaba irangwa n’ibibyimba bifata imyakura.

Ni indwara idakunze gukira kandi ishobora kuvamo kanseri, ikagira ibice bibiri aribyo ‘neurofibromatosis type I’ (NF1) na ‘neurofibromatosis type II’ (NF2).

NF1 igaragara ku muntu umwe mu bantu ibihumbi bitatu bavuka, naho NF2 yo ntikunze kuboneka kuko umuntu umwe ashobora kuyirwa mu bantu ibihumbi 35 bavuka.

Ibi bibyimba ubirwaye apimwe bagasanga bitaravuyemo kanseri bashobora kubibaga, nubwo bidatanga ikizere ko yakira burundu.

Abahanga mu buvuzi bavuga ko 50% by’abayirwara biba byaturutse ku ruhererekane rw’abo bakomokaho.

umuyobozi w’ibitaro bya Rubavu avuga ko Bakundukize Ruth yarwaye NF1, nubwo ibibyimba biri ku maboko bishobora kubagwa ariko harebwa ikitamushyira mu kaga ari ukubireka cyangwa ku bibaga.

MENYA UMWANDITSI

Sylidio Sebuharara

Umunyamakuru

@ sebuharara

Reba inkuru zose nanditse ( 1631 )