Ku wa Gatanu tariki 05 Werurwe 2021, nibwo mu Rwanda hatangiye igikorwa cyo gukingira abantu COVID-19 haherewe ku bantu bafite ibyago byo kuyandura byoroshye cyane barimo abahura n’abantu benshi ndetse n’abarengeje imyaka 65 y’amavuko.

Icyakora hari abatarahabwa urukingo usanga bavuga ko rufite ingaruka nyinshi ku buryo bishobora no gutuma hari abagira ubwoba ntibarufate.

Minisitiri Ngamije avuga ko ibimenyetso umuntu wakingiwe agaragaza ari ibisanzwe kandi byoroheje ku buryo yabona imiti imugabanyiriza ububabare kandi yoroshye kuboneka.

Avuga ko ku rukingo rwa mbere (Dose ya mbere) hari abatagira ingaruka ariko ku rukingo rwa kabiri bakaba bashobora kugira ingaruka bitewe n’uko umubiri uba watangiye gutozwa guhangana na COVID-19.

Ati “Hari abamara gukingirwa bakagira akantu kameze nk’isereri ari nayo mpamvu tubasaba kumara iminota 15 bicaye, hari abagira ibimeyetso bigizwe n’umuriro wagera kuri 38oC na 39oC, kuribwa umubiri wose cyane cyane mu ngingo no kuribwa umutwe kandi imiti iraboneka ku kigo nderabuzima ndetse no muri Farumasi”.

Dr. Ngamije avuga ko kugira ibyo bimenyetso atari bibi ahubwo ari byiza kuko bigaragaza ko umubiri uba watangiye kugira ubudahangarwa no kwitegura guhangana na Covid-19.

Yongeraho ko kugeza ubu ku nkingo 340,000 zamaze kuboneka abaturage bamaze kuzihabwa bagera kuri 90%.

Avuga kandi ko hari izindi zitegerejwe haba iziza mu buryo bwa COVAX ndetse no bundi buryo harimo ubw’Umuryango wa Afurika yunze ubumwe ndetse n’ubw’igihuguki zitegereje, ku buryo uyu mwaka uzarangira abaturage bangana na 30% bamaze gukingirwa.

Minisitiri Ngamije avuga ko gukingirwa bitabuza umuntu kwandura ahubwo bishobora kumurinda kurwara Covid-19 y’igikatu ku buryo yamuhitana.

Yungamo ko urubyiruko cyane cyane ari rwo ngo usanga ruvuga ko mu gihe bakingiwe baba batacyanduye icyo cyorezo, uretse ko ngo nabo ari bacye babitekereza gutyo.

Ati “Bakwiye kumva ko gukingirwa bitabuza umuntu kuba yakwandura, ziriya nkingo uko ari enye zimaze kwemezwa n’izindi zizemezwa nta rugukingira 100% ku buryo utakwandura, ahubwo rushobora kugukingira 100% ku buryo utarwara Covid-19 y’igikatu ya yindi ikwica nyine”.

Akomeza asaba abamaze guhabwa inkingo gukomeza ingamba zo kwirinda nk’uko zashyizweho n’inzego z’ubuzima.