Ibihugu bya Afurika bikomeje kwakira inkingo za Covid-19

Kuva mu mpera z’ukwezi kwa Gashyantare 2021, ibihugu bitandukanye ku mugabane wa Afurika byatangiye guhabwa inkingo za covid 19 binyuze muri gahunda ya Covax.

Inkingo za Covid-19 ziragenda zigera mu bihugu bitandukanye bya Afurika
Inkingo za Covid-19 ziragenda zigera mu bihugu bitandukanye bya Afurika

Ku ikubitiro Ghana yabaye igihugu cya mbere cyakiriye inkingo za Covid-19 zatanzwe muri gahunda yo kugeza inkingo ku isi izwi nka Covax y’Ishami ry’Umuryango w’Abibumbye rishinzwe Ubuzima (OMS), igamije gusaranganya inkingo ku batuye isi bo mu bihugu byose.

Ku itariki ya 24 Gashyantare 2021 nibwo Ghana yakiriye dose z’inkingo zingana n’ibihumbi magana atandatu (600,000) zo mu bwoko bwa AstraZeneca.

Mu ntangiro z’ukwezi kwa Werurwe Côte d’Ivoire yatangiye igikorwa cyo gukingira nyuma yo kwakira inkingo zo muri gahunda ya Covax, kimwe na Nigeria.

Mu gitondo cyo kuri uyu wa 03 Werurwe 2021, u Rwanda narwo rwakiriye inkingo ibihumbi 240 za Covid-19 zo mu bwoko bwa AstraZeneca na none muri iyo hgahunda ariko rukaba rugomba kugerwaho n’izisaga ibihumbi 300.

Biteganyijwe ko icyiciro cy’izindi nkingo 102,960 za Covid-19 zo mu bwoko bwa Pfizer zigezwa i Kigali ku mugoroba wo kuri uyu wa Gatatu.

Kenya yakiriye dose zingana na miliyoni 1.02 z’inkingo za Oxford-AstraZeneca, iba ibaye igihugu cya gatatu muri Africa y’Iburasirazuba binyuze muri gahunda ya Covax. Icyo gihugu cyemeza ko dose cyabonye zihagije ku gukingira abantu 500.000 mu cyiciro cya mbere kigizwe n’abakozi bashinzwe ubuzima, abarimu, abapolisi n’abasaza.

Ahandi hageze inkingo za AstraZeneca ni muri Repubulika Iharanira Demokarasi ya Congo (RDC). Mu ijoro ryo ku wa Kabiri nibwo Minisitiri w’Ubuzima, Eteni Longondo yari ku kibuga cy’indege aho yakiriye miliyoni 1.7 z’urwo rukingo.

Ikinyamakuru BBC dukesha iyi nkuru kivuga ko RDC iteganya kwakira izindi nkingo miliyoni 6.9 zose zigomba gutangwa kuva zikigera mu gihugu kugeza mu mpera za Gicurasi 2021.

Kuri uyu wa Gatatu kandi, Angola yakiriye inkingo 624.000, mu gihe Gambia yakiriye dose 36.000 z’urukingo rwo mu bwoko bwa Oxford AstraZeneca muri gahunda ya Covax.

Aho inkingo zigeze bahita batangira gukingira
Aho inkingo zigeze bahita batangira gukingira

Gahunda ya Covax yashyizweho n’Ishami ry’Umuryango w’Abibumbye ryita ku buzima (OMS), mu rwego rwo gufasha ibihugu bikennye guhabwa inkingo za covid 19.

Biteganyijwe ko izageza dose zirenga miliyari ebyiri ku bantu bo mu bihugu 190 mu gihe kitarenze umwaka.

Ibyo bibaye nyumwa y’aho bitangarijwe ko ibihugu 24 bya Africa bizahabwa vuba inkingo za Covid-19 muri gahunda ya Covax ishyigikiwe na Loni, hakaba hashize iminsi OMS ndetse n’abayobozi batandukanye ku isi bavuga ko ibihugu bikize byihariye inkingo za Covid-19.

Urukingo rwa AstraZeneca rukorerwa mu Bwongereza mu gihe urwa Pfizer-BioNTech rukorerwa muri Leta Zunze Ubumwe za Amerika.

Shakisha izindi nkuru
kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka