Uwo muyobozi kandi avuga ko n’abahawe urukingo rwa kabiri ubu bari hejuru ya 70%, agashishikariza abasigaye kwihutira kwikingiza na bo, cyane ko na serivisi zo gukingira zagiye zegerezwa abaturage cyane cyane mu duce duhuriramo abantu benshi.

Agira ati “Kwikingiza ni yo ntwaro mbona yatuma tubasha gukomeza guhangana n’icyorezo cya Covid-19, kandi n’imibare irabyerekana, ari iy’ubwandu tugenda tubona ari n’iy’abagenda batakaza ubuzima murabona ko yagabanutse, kandi ni umusaruro w’izi nkingo.”

Anavuga ko mu bukangurambaga bwo gushishikariza abantu kwikingiza, hari aho bagiye basanga ababibuzwa n’abahabwa inyigisho z’ubuyobe.

Ati “Hari nk’aho twagiye mu Murenge wa Kigoma, umuntu atwereka urupapuro bamwandikiyeho imirongo yo muri Bibiliya ivuga kuri Covid-19, noneho tubwira Pasiteri ngo ajye amubwira umurongo hanyuma amusomere. Tuza gusanga hari igice bamwandikiye kitaba muri Bibiliya.”

Uwo muntu amaze kubona ko bamubeshye yaremeye arakingirwa.

Meya Sebutege ati “Ibi bigaragaza ko iyo umuntu abeshya agerageza gukoresha inzira zose zituma uwo abwira amwumva, ariko iteka ukuri guhora ari ukuri, kandi icyiza gihora ari icyiza.”

Akomeza avuga ko abaganga biteguye kuganira n’abafite impungenge kugira ngo bazibamare.