Gutanga doze ya kabiri ishimangira y’urukingo rwa Covid-19 birakomeje

Yanditswe na

Ernestine Musanabera

11-08-2022 - 07:51' | Ibitekerezo ( )

Kuva tariki ya 8 Kanama 2022, Minisiteri y’Ubuzima (MINISANTE) yatangiye gutanga doze ya kabiri ishimangira y’urukingo rwa Covid-19, ku bageze mu zabukuru ndetse n’abandi bafite ibibazo by’ubuzima, iyo gahunda ikaba ikomeje ndetse n’abaturage barimo kuyitabira kuko bumva akamaro kayo.

Abakuze barimo guhabwa doze ya kabiri ishimangira y'urukingo rwa Covid-19

Bamwe mu bakuze barengeje imyaka 60 batangiye kwitabira kwikingiza, nk’uko amabwiriza ya Minisiteri y’ubuzima abivuga, mu butumwa bwayo bwo gukangurira abaturage gufata dose ya kabiri ishimangira.

Nyirarugendo Marie Grace, umwe mu bahawe urwo rukingo, avuga ko yizanye kwikingiza kuko yumvise ko bireba abakuze.

Ati “Ntabwo ari ngombwa ko barinda kubwiriza umuntu ukuze nkanjye kujya kwikingiza, turabyumva rwose kandi buri Munyarwanda wese ubu azi akamaro ko kwikingiza”.

Kuri Site y’ikingira i Gikondo ahabera imurikagurisha, n’ubwo hari urujya n’uruza rw’abantu benshi, usanga abitabira guhabwa inkingo baza umuntu umwe umwe.

Nta mibare itangazwa n’Ikigo cy’Igihugu gishinzwe ubuzima (RBC), y’abitabiriye kwikingiza urukingo rwa doze ya kabiri ishimangira kuko bitangazwa buri cyumweru, nk’uko Julien Mahoro Niyingabira, umuyobozi ushinzwe ibikorwa by’isakazamakuru muri RBC abivuga.

Ati “Imibare y’abakingiwe itangazwa buri cyumweru, ntabwo ubu twababwira imibare y’abamaze gukingirwa uko ingana”.

Niyingabira avuga ko iki gikorwa kirimo kubera kuri site zose z’ikingira mu gihugu, Minisiteri igasaba Abanyarwanda bose kwitabira guhabwa uru rukingo kugira ngo bahashye icyorezo cya Covid-19 bikingiza byuzuye.

Nk’uko MINISANTE igaragaza ko icyorezo cya Covid-19 kitaracika burundu, kuko buri munsi hagaragara umubare w’abanduye iki cyorezo, ikaba isaba abantu gukomeza ingamba zo kucyirinda, hubahirizwa amabwiriza yashyizweho ajyanye no kugira isuku no guhabwa inkingo ku buryo bwuzuye.

Imibare itangwa na Minisiteri y’Ubuzima igaragaza ko abamaze kwitaba Imana mu Rwanda bazize Covid-19 ari abantu 1,466.

Intego ya Minisiteri y’ubuzima ni uko uyu mwaka wa 2022 uzarangira Abanyarwanda bagera kuri 60 % baramaze guhabwa inkingo zose za Covid-19.

Umunyamabanga wa Leta muri Minisiteri y’Ubuzima, Lt. Col. Dr. Tharcisse Mpunga, yasobanuye ko impamvu yo gutanga iyi doze ya kabiri ishimangira y’urukingo rwa Covid-19, ari ukubera ko virusi yayo igenda ihindagurika, kandi inkingo zifashishwa zikaba zarakozwe hagendewe ku bwoko bwa virusi yari iriho icyorezo kicyaduka.