Nubwo inkingo zamaze kwemezwa, zigaragaza ko zidatanga ikizere 100%, abahanga mu buvuzi bakavuga ko abahabwa inkingo batagomba kwirara ahubwo bakomeza kwirinda.

Ishami ry’Umuryango w’Abibumbye ryita ku buzima (OMS), ryemeje ko urukingo Pfizer/BioNTech rufite ubushobozi bwo gukingira kugera kuri 95% rukagurishwa Amadolari ya Amerika 14,81 rugatangwa mu byiciro bibiri bifite intera ibarirwa mu minsi 28.

Hari Moderna itanga ikizere kugera kuri 94,1% rukagurishwa Amadolari ya America 18, narwo rutangwa mu byiciro 2 bifite intera ibarirwa mu minsi 28. Hari kandi AstraZeneca bivugwa ko rufite ubushobozi bwo kurinda uwaruhawe ku kigero cya 70% rukagurishwa Amadolari 3,10 rugatangwa na rwo mu byiciro 2 bifite intera y’iminsi 28.

Mu zindi zakozwe harimo Janssen (Johnson & Johnson), urwakorewe mu Burusiya Spoutnik-V bivugwa ko rufite ubushobozi bwo gukingira Covid-19 ku kigero 91,4% rutangwa inshuro eshatu rukagurishwa amadolari 10, urukingo Sinopharm rwakorewe mu Bushinwa bivugwa ko rukingira ku kigero cya 79,34% rutangwa mu byiciro 2 bifite intera ibarirwa mu minsi 28.

Izo nkingo ziterwa abantu kugira ngo zishobore kongera ubudahangarwa bw’umubiri mu kurwanya icyorezo cya Covid-19, no gutuma uwacyandura adashobora kuremba cyangwa kwanduza.

Inkingo za Pfizer/BioNTech na Moderna zamaze gutangwa mu bihugu bimwe nka Amerika, Canada no ku mugabane w’u Burayi ndetse zimwe zatangiye kugera no ku mugabane wa Afurika.

Dr. Leana Wen, umuhanga mu buvuzi akaba umwarimu muri George Washington University, agira inama abantu bitegura guhabwa urukingo kutarutinya no gufata gahunda ihamye yo kuruhabwa.

Agira ati “Ni byiza kumenya amakuru y’urukingo ugiye guhabwa, harimo no kubaza umuganga wawe niba rutazagirwaho ingaruka n’imiti yihariye ufata”.

Dr. Leana avuga ko abantu bamaze guhabwa urukingo basabwa gutegereza iminota hagati ya 15 na 30 bicaye aho baherewe urukingo, cyangwa mu modoka kugira ngo harebwe niba nta ngaruka rushobora kubagiraho.

Agira kandi inama abantu yo gukomeza kwirinda kugeza barangije gufata inkingo zombi uko ziteganyije, ni ukuvuga igihe urukingo ruba rutuzuye ngo rutange ubwirinzi bwizewe.

Agira ati “Inkingo nka Pfizer na Moderna zizweho basanga kugira ngo ubudahangarwa buboneke zigomba gutangwa mu byiciro bibiri, kandi uzihabwa agomba kubahiriza icyo gihe”.

OMS ivuga ko ubu abantu bashyizwe imbere mu kubona inkingo ari abakuze, abafite indwara karande, abakora mu nzego z’ubuzima, abakora mu bigo bibahuza n’abantu benshi nk’abarimu n’izindi nzego.

Ishami ry’Umuryango w’Abibumbye ryita ku bana (UNICEF) risaba ko abarezi bashyirwa ku ruhembe rw’abagomba kubona urukingo nyuma y’abantu bakuze, abafite indwara karande hamwe n’abakora mu nzego z’ubuzima.

UNICEF ivuga ko mu gihe abarezi bazahabwa urukingo bizatuma amashuri abona umutekano wo gukora, ntiyongere gufungwa nkuko biboneka hamwe na hamwe.