Bangladesh: Habonetse abantu 68 banduye COVID-19 mu masaha 24

Yanditswe na

Mediatrice Uwingabire

4-06-2023 - 22:48' | Ibitekerezo ( )

Mu gihe Ishami ry’Umuryango w’Abibumbye ryita ku Buzima (OMS) riherutse gutangaza ko Covid-19 itakiri icyorezo, muri Bangladesh habonetse abantu 68 bashya bayanduye mu masaha 24, ni ukuvuga kugeza mu gitondo ku Cyumweru tariki 04 Kamena 2023, ibyo bikaba byatumye umubare w’abanduye icyo cyorezo muri rusange muri icyo gihugu kuva cyakwanduka uzamuka, ugera kuri 2,039,639.

Mbere yaho hari habonetse abandi 89 banduye Covid-19 mu munsi umwe gusa, ku wa Gatanu tariki 2 Kamena 2023.

Imibare y’abishwe n’icyo cyorezo muri icyo gihugu kandi na yo yazamutse kuko hiyongereyeho abandi bantu babiri, harimo umugabo n’umugore bapfuye mu masaha 24, ubu umubare w’abishwe n’icyo cyorezo muri icyo gihugu muri rusange ukaba ugeze ku bantu 29.448, nk’uko byatangajwe na Guverinoma y’icyo gihugu.

Ni ubwa mbere hongeye kugaragara abantu bandura Covid-19 ndetse n’abicwa na yo muri icyo gihugu mu minsi 66 ishize.

Mu bantu 1.515 bapimwe Covid-19 hirya no hino muri icyo gihugu, abagera kuri 5.87 basanzwe bayanduye.

Akarere ka Dhaka ni ko kagaragayemo abenshi muri abo banduye Covid-19 bashya, mu turere 83 tugize icyo gihugu.

Icyorezo cya Covid-19 cyageze mu bihugu n’Intara bisaga 210 hirya no hino ku Isi, uhereye igihe umuntu wa mbere ufite Covid-19 yagaragariye mu Bushinwa mu Kwezi k’Ukuboza 2019.

Tariki 5 Gicurasi 2023, nibwo Umuyobozi w’Ishami ry’Umuryango w’Abibumbye ryita ku Buzima (WHO/OMS), Tedros Adhanom Ghebreyesus, yatangaje ko hari icyizere gikomeye ko Covid-19, itakiri icyorezo gihangayikishije Isi.