Bahawe doze ya kabiri y’urukingo rwa Covid-19, biyemeza gukomeza kwirinda

Kuva ku wa Gatandatu tariki 29 Gicurasi 2021, mu gihugu hose hatangiye igikorwa cyo gutanga doze ya kabiri y’urukingo rwa Covid-19 ku bahawe urwa AstraZeneca, baherukaga guhabwa urukingo rwa mbere, biyemeza gukomeza kwirinda icyo cyorezo.

Bahawe doze ya kabiri y
Bahawe doze ya kabiri y’urukingo rwa AstraZeneca

Mu Karere ka Musanze, kuri site 17 zateganyijwe mu bigo nderabuzima bihabarizwa n’ibitaro bikuru bya Ruhengeri bikorana na byo, harifashishwa doze z’urukingo rwo mu bwoko bwa AstraZeneca.

Abo Kigali Today yasanze bamaze guhabwa urwo rukingo, bishimiye ko bakingiwe, bityo ibyago byo kuzahazwa na Covid-19, bikaba bigiye kugabanuka.

Muhire Jean de Dieuv yagize ati “Nshimishijwe no kuba mpawe urukingo rwa kabiri rwa Covid-19. Twibazaga igihe urukingo ruzazira, ariko ikigaragara cyo nk’uko Leta yacu yakomezaga kuduhumuriza, batubwira ko mu gihe gito tuzakingirwa, imvugo rero ibaye ingiro. Ni ikigaragaza ko igihugu cyacu kidukunda kandi kitwitayeho. Tubyakiriye neza cyane”.

Doze ya kabiri y’urukingo rwa Covid-19, itanzwe mu gihe hari hashize ibyumweru bikabakaba 10 hatanzwe dose ya mbere, kuko yo yari yatanzwe mu ntangiriro za Werurwe uyu mwaka.

Amabwiriza y’Ishami ry’Umuryango w’Abibumbye ryita ku buzima OMS, agena ko doze ya kabiri y’urukingo rwo mu bwoko bwa AstraZeneca, itangwa hagati y’ibyumweru 8 na 12.

Abakingiwe ngo ntibazadohoka mu kwirinda Covid-19
Abakingiwe ngo ntibazadohoka mu kwirinda Covid-19

Dr Sabin Nsanzimana, Umuyobozi w’Ikigo cy’Igihugu cy’Ubuzima RBC, mu kiganiro yagiranye na Televiziyo y’Igihugu ku wa gatanu tariki 29 Gicurasi 2021, yagize ati: “Ni igihe cyiza dutangiye uru rukingo ku bantu bari babonye dose yambere. Duteganya ko uko n’izindi nkingo zizagenda ziboneka, tuzakomeza gukingira abantu, harimo n’abatarabona urukingo rwa Covid-19 rwa mbere. Kuko ari gahunda izakomeza kugeza no mu mwaka wa 2022, aho twifuza kuba twageze kuri 60% y’abaturarwanda bose; ndetse uko ubushakashatsi bukomeza, bigaragara ko n’abakiri bato bari munsi y’imyaka yari yaragenwe na bo bazagera ubwo bakingirwa bityo n’iyo mibare ikaba yakwiyongera”.

Yongera ati: “Twibutsa abahawe doze zombi ko atari umwanya wo kwirara, ngo bibwire ko gukingirwa bibagize abadahangarwa na Covid-19. Urukingo ntiruhagarika ko umuntu yakwandura cyangwa ngo yanduze abandi. Nibakomeze bitwararike”.

Abantu bahabwa doze zose zigenwa n’amabwiriza y’inkingo zimaze kwemezwa kugeza ubu za Covid-19, bibongerera amahirwe ku kigero gishobora no kugeza ku 100%, yo kubarinda gusa kuzahazwa cyangwa guhitanwa na yo.

Abikingiza bari bagenewe aho kwicara buri wese ategereje ko agerwaho
Abikingiza bari bagenewe aho kwicara buri wese ategereje ko agerwaho

Kuri iyi nshuro, harifashishwa inkingo za Covid-19 zisaga ibihumbi 247, mu gukingira abantu, bikorewe ku masite atandukanye ari mu gihugu hose nk’uko Dr Sabin Nsanzimana yakomeje kubivuga.

Yanongeyeho ko ku bantu batakibarizwa mu gace bafatiyemo urukingo rwa mbere, wenda barimutse, ngo atari ngombwa kongera gutega imodoka basubirayo kwikingiza. Abo ngo bemerewe kugana ibigo nderabuzima bibegereye, bagakingirwa.

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka