Kuva tariki ya 8 Kanama 2022, Minisiteri y’Ubuzima yatangiye gutanga doze ya 2 y’urukingo rwa Covid-19 ku bageze mu zabukuru, ndetse n’abandi bafite ibibazo by’ubuzima.

Umunyamabanga wa Leta muri MINISANTE, Lt. Col. Dr. Tharcisse Mpunga, yasobanuye ko impamvu yo gutanga iyi doze ya kabiri ishimangira y’urukingo rwa COVID-19, ari ukubera ko virusi yayo igenda yihinduranya, kandi inkingo zifashishwa zikaba zarakozwe hagendewe ku bwoko bwa virusi yari iriho icyorezo kicyaduka.

Dr Mpunga avuga ko Abanyrwanda bamaze kumva akamaro ko kwikingiza, ukurikije imibare y’abamaze guhabwa urukingo rwa Covid-19.

Imibare itangwa na Minisiteri y’Ubuzima igaragaza ko abamaze kwitaba Imana mu Rwanda bazize Covid-19 ari abantu 1,466.

Intego y’iyo Minisiteri ni uko uyu mwaka wa 2022 uzarangira Abanyarwanda bagera kuri 60% baramaze guhabwa inkingo zose za Covid-19.

Imibare yatangajwe nyuma y’icyumweru kimwe hatangiye gutangwa Doze ya kabiri, igaragaza ko abamaze guhabwa doze ya mbere bagera kuri 9,158,928, abahawe Doze zombi uko ari 2 bagera kuri 8,900,742 naho abagera kuri miliyoni 5.391.772 bahawe dose ishimangira.

Igikorwa cyo gukingira Covid-19 kirimo kubera kuri site zose z’ikingira mu gihugu, MINISANTE igasaba Abanyarwanda bose kwitabira guhabwa uru rukingo, kugira ngo bahashye icyorezo cya Covid-19 bikingiza byuzuye.

Imibare ya MINISANTE igaragaza ko icyorezo cya Covid-19 kitaracika burundu, kuko buri munsi hagaragara abanduye, ikaba isaba abantu gukomeza ingamba zo kwirinda, hubahirizwa amabwiriza yashyizweho ajyanye no kugira isuku no guhabwa inkingo ku buryo bwuzuye.