Umuyobozi wungirije ushinzwe guhuza ibikorwa byo gukingira Covid-19 muri RBC, Bibianne Uwiragiye, avuga ko kuri ubu hari gutangwa urukingo rwa kane rwo gushimangira, ruhabwa abageze mu myaka 50 y’ubukure kuzamura.

Avuga ko ubu abantu bari guhabwa urukingo rwa kane rwo gushimangira rwa Pfizer, kandi ururimo gutangwa rufite ibyongewemo bifasha cyane abarwaye indwara zidakira kubaka ubwirinzi bw’umubiri.

Uwiragiye avuga ko hakenewe ubukangurambaga kuko icyorezo kitaracika burundu, kandi ko abanyamakuru bakwiye gufasha muri ubwo bukangurambaga nk’urwego rutanga amakuru yizewe, kuko hakiri ibihuha bituma abaturage batitabira kwikingiza, kubera ahanini imyumvire ishingiye ku myemerere.

Agira ati “Itangazamakuru ryaradufashije mu guhangana na Covid-19, kuko inkuru zizewe zigera ku bantu benshi mu gihe gito, kandi abaturage bizera amakuru, niyo mpamvu twifuje ko ryakomeza kudufasha ngo abantu bamenye amakuru nyayo kuri Covid-19 kandi bakomeze kwitabira kwikingiza”.

Asobanura ku kijyanye n’abigeze kuvuga ko hari inkingo za Covid-19 zarangije igihe ziri guhabwa abaturage, Uwiragiye yavuze ko hari habayeho kwitiranya igihe inikingo zakorewe n’igihe zagerejwe mu Rwanda, kandi ko hari ibigenderwaho ngo urukingo rutangwe, kandi ko Leta idashobora guha abaturage bayo inkingo zarengeje igihe.

Umuryango utabara imbabare mu Rwanda, Croix Rouge, atangaza ko n’ubwo icyorezo cya Covid-19 yacishije macye, kigihari kandi abacikanywe n’inkingo bakwiye kwikingiza kugira ngo barusheho kubaka ubudahangarwa bw’umubiri.

Umuyobozi wa Croix Rouge Rwanda, Françoise Mukandekezi, avuga ko nyuma y’ibikorwa by’ubutabazi ikora, inagira uruhare mu bukangurambaga bwo kurwanya ibiza n’ibindi byorezo byakwibasira ubuzima bwa benshi.

Abanyamakuru bafatanya na Croix Rouge Rwanda mu bikorwa by’ubutabazi kandi basobanuriwe ibindi bikorwa byayo, bigamije kuzamura imibereho y’abaturage bahuye n’ingaruka za Covid-19, birimo no kubagezaho amazi meza.