Abandura Covid-19 ku isi bagabanutseho 17% mu cyumweru gishize – WHO

Imibare igaragazwa na raporo y’Ishami ry’Umuryango w’Abibumbye ryita ku Buzima (WHO), itanga icyizere ko isi yaba imaze kurenga ibihe bikomeye mu guhangana na Covid-19.

Inkuru dukesha ikinyamakuru CNN, ivuga ko imibare y’abandura Covid-19 ku isi, yagabanutseho 17% mu cyumweru gishize.

Imibare y’abahitanywe n’icyo cyorezo hirya no hino ku isi, nayo yaragabanutse kuko iyo raporo ya WHO igaragaza ko abishwe na Covid-19 ku isi mu cyumweru gishize, bari 88,000, ni ukuvuga ko iyo mibare yagabanutseho 10% ugereranyije n’iyo mu cyumweru cyakibanjirije.

Abantu basaga Miliyoni 3.1 nibo bashya banduye Covid-19 mu cyumweru gishize nk’uko bigaragazwa n’iyo raporo itangwa buri cyumweru. Ibyo ngo bisobanuye ko imibare y’abandura Covid-19 bashya hirya no hino ku Isi, yagabanutseho 17%, Ugereranyije n’imibare yo mu cyumweru cyakibanijirije, ndetse uwo ngo ukaba ari wo mubare muto w’abanduye Covid-19, uhereye tariki 26 Ukwakira 2020.

Iyo raporo ya WHO ivuga kandi ko “Nubwo hirya no hino ku isi hari ibihugu bigifite imibare myinshi y’abandura Covid-19, ariko ku rwego rw’Isi iryo gabanuka ry’abandura bashya riratanga icyizere”.

Kugeza uyu munsi tariki 11 Gashyantare 2021, Muri rusange uhereye igihe icyorezo cya Coronavirus cyatangiriye, abamaze kwandura Covid-19 ku rwego rw’isi, bajya kugera kuri Miliyoni 107 naho abamaze guhitanwa nayo bakaba basaga Miliyoni 2.3 nk’uko imibare itangwa na Kaminuza ya ‘Johns Hopkins University’ ibigaragaza.

Iryo gabanuka ry’imibare y’abandura Covid-19 ku Isi, rirajyana n’ibyo Umuyobozi w’Ikigo cy’Igihugu gishinzwe Ubuzima (RBC), Dr Sabin Nsanzimana yatangaje abinyujije kuri Twitter ku itariki 8 Gashyantare 2021.

Yagize ati “Nyuma y’iminsi 21 ya ‘Guma mu rugo’ mu kurwanya Coronavirus mu Mujyi wa Kigali, abandura bashya bagabanutseho 72%, dukomereze aho. Ambara agapfukamunwa, karaba intoki, siga intera hagati yawe n’abandi, irinde kujya ahari abantu benshi, irinde kujya ahafunganye. Shishoza”.

Imibare ya Minisiteri y’Ubuzima (MINISANTE), igaragaza ko mu Rwanda kugeza uyu ku itariki ya 11 Gashyantare 2021, abamaze kwandura Covid-19 ari 16,941, abo yahitanye ni 229, mu gihe abamaze kuyikira ari 13,389.

Shakisha izindi nkuru
kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka