Abana b’imyaka 5-11 bagiye gufatira urukingo rwa Covid-19 ku ishuri

Minisiteri y’Ubuzima (MINISANTE) yatangaje ko igiye guha amashuri amafishi yuzuzwa n’ababyeyi, kugira ngo abana bari mu kigero cy’imyaka 5 kugera kuri 11, na bo bazahabwe urukingo rwa Covid-19.

Byatangajwe n’Umunyamabanga wa Leta muri MINISANTE, Lt Col Dr Tharcisse Mpunga, mu itangazo ryashyizwe ku rubuga rwa Twitter rw’iyo Minisiteri, ku wa Kabiri tariki 20 Nzeri 2022.

Lt Col Dr Mpunga avuga ko urukingo rwa Covid-19 ruzahabwa aba bana rwihariye, kandi ngo rubongerera amahirwe yo kutazahazwa na Covid-19 ikomoka ku moko yayo yinduranyije, yagiye aboneka hirya no hino ku Isi.

Akomeza avuga ko uru rukingo ruzahabwa abana rwakorewe ubushakashatsi bwimbitse, kandi ngo rwemejwe n’Ishami ry’Umuryango w’Abibumbye ryita ku Buzima(OMS), inzego mpuzamahanga hamwe n’izo mu Gihugu zishinzwe kugenzura imiti n’inkingo.

Avuga ko iyi gahunda yo gukingira abana isanzwe ikorwa mu bihugu bitandukanye, kandi ikaba imaze gutanga umusaruro mwiza mu kurinda ubuzima bw’abana.

Yongeraho ko n’ubwo mu Rwanda imibare y’abana barwaye cyangwa bahitanywe na Covid-19 itabaye myinshi, ngo hari abarembejwe na yo ndetse n’abo yishe.

Dr Mpunga ashishikariza ababyeyi b’abana bafite imyaka 5-11 kwitabira iyi gahunda, bagasinyira abana ifishi yabugenewe kugira ngo bakingirwe.

Akomeza agira ati "Turakorana n’amashuri abana bigaho kugira ngo amafishi abemerera gukingirwa agezwe ku babyeyi, asinywe anagarurwe ku Ishuri aho gahunda izajya ibera."

Dr Mpunga asaba ubufatanye mu kurinda abana icyorezo cya Covid-19, bahabwa urukingo kuko ngo ari ubuzima.

ADVERTISEMENT
rkad1
kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka