Abakingiwe Covid-19 bamaze kurenga miliyoni eshatu

Minisiteri y’ubuzima (MINISANTE) iratangaza ko byibuze abantu bamaze gufata doze imwe y’urukingo rwa Covid-19 mu Rwanda barenga gato miliyoni eshatu.

Ni muri gahunda yo gukingira mu buryo bwagutse irimo gukorerwa mu ntara zose, aho kuva ku itariki 09 Ukwakira 2021, abantu 894.792 aribo bamaze gukingirwa muri gahunda yiswe #KingiraURwanda.

Gahunda yo gukingira Covid-19 yashyizwemo imbaraga na Leta y’u Rwanda kuko MINISANTE ivuga ko ifite intego y’uko uyu mwaka uzajya kurangira abagera kuri 35% by’abantu bose bagomba gukingirwa bazaba bamaze guhabwa urukingo.

Muri iyi minsi mu turere turi hanze ya Kigali, ni ho hashyizwe imbaraga cyane kuko abatuye mu Mujyi wa Kigali, abarenga 90% bamaze byibuze gufata doze imwe y’urukingo rwa Covid-19, bikaba byatanze umusaruro ufatika kuko byatumye imibare y’abandura ndetse n’abazahazwa n’iki cyorezo idakomeza kuzamuka, aho kugeza ubu muri Kigali ishusho y’ubwandu iri ku kigero cya 0.5.

N’ubwo bimeze gutya ariko, MINISANTE irakomeza kuburira Abanyarwanda n’abarutuye ko badakwiye kudohoka ku mabwiriza yo kwirinda Covid-19 kuko gukingirwa bidaha uwakingiwe ubudahangarwa bwo kuba yakwandura cyangwa ngo yanduze abandi.

Ngo gukora siporo cyane ntibyakurinda kwandura Covid-19, no kuba ufite ubuzima bwiza ntibyakubuza kuyandura, yewe ngo no kuba utarajya mu bitaro na rimwe ntibivuze ko Covid-19 itakuzahaza, ahubwo icyo abantu basabwa n’ukwipimisha, gukingirwa ndetse no kutadohoka ku mabwiriza yo kuyirinda.

Ikindi ni uko hari uturere tugera kuri tune tukigaragaramo ubwandu bwinshi, aho imibare yerekana ko mu turere twa Gicumbi, Kamonyi, Karongi ndetse na Ngororero hari ubwandu buri hejuru ya 10, ibintu bishobora gushyira ubuzima bwa benshi mu kaga mu gihe habaho kudohoka ku mabwiriza yo kwirinda Covid-19.

Uretse abasaga gato miliyoni 3 bamaze byibuze kubona doze imwe y’urukingo, kugeza tariki 17 Ukwakira 2021, imibare yerekana ko abagera kuri 1.725.362 aribo bamaze guhabwa doze zombi z’urukingo rwa Covid-19 mu Rwanda.

Uko abantu bagiye bakingirwa guhera tariki 09 Ukwakira kugera tariki 17 Ukwakira 2021
Uko abantu bagiye bakingirwa guhera tariki 09 Ukwakira kugera tariki 17 Ukwakira 2021

Tariki 15 Ukwakira 2021, u Rwanda rwakiriye doze z’inkingo za Covid-19, ibihumbi 135.690 zo mu bwoko bwa AstraZeneca, zatanzwe na Leta ya Maltes zikaba zarahise zoherezwa mu turere turi hanze y’Umujyi wa Kigali kugira ngo na ho bakomeze gukingira umubare mwinshi ushoboka.

Minisiteri y’ubuzima iravuga ko uko inkingo zizakomeza kuboneka, ari ko n’Abanywaranda bazakomeza kugenda bakingirwa mu rwego rwo gukomeza guhangana n’icyo cyorezo cyibasiye isi.

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka