Ni impuruza yashyizwe kuri twitter ya RBC igira iti "Umuntu ufite imyaka 18 kuzamuka – umunyarwanda cyangwa umunyamahanga – mu Mujyi wa Kigali wacikanwe n’urukingo: Nyarukira i Gikondo kuri Expo Ground bagukingire uyu munsi tariki ya 8 Ukwakira 2021 cyangwa ejo tariki ya 9 Ukwakira 2021."
Iyi mpuruza ije nyuma y’uko Rwanda rwakiriye inkingo za Covid-19 zirenga miliyoni, zitanzwe n’ibihugu bitandukanye nk’Ububiligi, Ubutaliyani n’ibindi bitandukanye mu gufasha Abanyarwanda kubona ubwirinzi bwa Covid-19.
Ubwandu bwa Covid-19 mu Rwanda buragenda bucika intege nyuma y’uko abantu benshi bahawe inkingo muri Kanama na Nzeri 2021.
Mu bipimo 10,466 byafashwe tariki ya 7 Ukwakira 2021, habonetse abarwayi 136 bangana na 1.2%, na ho mu cyumweru cyose hapimwe abantu 77,718 haboneka abarwayi 828 bangana na 1%.
Ibi biratanga icyizere ko inkingo zigira uruhare mu kongerera ubudahangarwa abazifata kuko Abanyarwanda baremba, umubare ugabanuka ndetse n’abapfa imibare ikagabanuka hagendewe ku makuru yatanzwe na Minisiteri y’Ubuzima.
U Rwanda rumaze gutanga doze 2,137,486 ku bakingiwe bwa mbere, na ho dose ya kabiri abamaze kuyihabwa ni 1,691,938.
Uko u Rwanda rukingira ni ko birwongera amahirwe yo kurekura ibikorwa aho utubari twari tumaze amezi 18 dufunze twafunguwe hagendewe ku mabwiriza yo kwirinda Covid-19, ni ko n’ingendo zijya mu mahanga zifungurwa ndetse bimwe mu bihugu byari byashyize u Rwanda mu mutuku rukawukurwamo.
Covid-19 yageze mu Rwanda tariki 14 Werurwe 2020, imaze guhitana abantu 1,297 mu gihe abamaze gufatwa ibipimo ari 2,896,278.
U Rwanda rumaze kubonekamo abarwayi 98,345 kandi abamaze gukira ni 45,493 na ho abakirwaye ni 51,555.
Ibitekerezo
Ohereza igitekerezo
|