Kuwa gatatu tariki 13/06/2012, ibiro by’umushinjacyaha muri ICC byongeye gusaba umucamanza gushyiraho impapuro zihagarika Sylvestre Mudacumura hamwe n’abandi bayobozi 5 kubera ibyaha byo kubangamira uburenganzira bwa muntu.

Hari kandi abandi bayobozi icyenda bo muri FDLR basabiwe gukorerwa impapuro zibata muri yombi kubera ibyaha by’intambara; nk’uko bigaragara mu itangazo ryashyizwe ahagaragara n’urukiko mpuzamahanga mpanabyaha (ICC).

Nyuma yuko ICC idahaye agaciro impapuro zari zatanzwe zo guhagarika Mudacumura hari imwe mu miryango yita ku burenganzira bwa Muntu yari yanenze icyo cyemezo cyane ko uyu muyobozi wa FDLR agomba kubazwa ibikorwa by’ububwicanyi n’urugomo rukorerwa abaturage bo mu burasirazuba bwa Congo babuzwa amahwemo na FDLR.

Umutwe wa FDLR ugizwe n’abasize bakoze Jenoside yakorewe Abatutsi mu Rwanda mu 1994. Uyu mutwe kandi ushinjwa guhungabanya umutekano, kwica no gufata ku ngufu abagore n’abakobwa mu burasirazuba bwa Congo.

Sylidio Sebuharara