Uyu mugore wa Ntahobali Shalom ufungiye ku Rukiko Mpuzamahanga Mpanabyaha rwashyiriweho u Rwanda, yebeshye ku amakuru ajyanye n’uburyo yitwaye muri Jenoside muri Mata 1994.

Nyuma yo kuba muri Amerika nk’umuturage ubyemewe hamenyekanye amakuru avuga ko Munyenyezi ashobora kuba yagize uruhare muri Jenoside yakorewe Abatutsi muri Mata 1994 mu Mujyi wa Butare.

Ibyo byatumye ajyanwa mu nkiko, ariko abacamanza bananirwa kumvikana ku maherezo ye muri Werurwe 2012. Urundi rubanza rwagombaga gusubukurwa muri Nzeri 2012 ntibyashobotse bitewe n’iperereza ku batangabuhamya ryari rigikorwa.

Umushinjacyaha w’urukiko rwa Concord ashinja Munyenezi ko muri Mata 1994 yategetse ko Abatutsi bicwa abandi bagafatwa ku ngufu kuri bariyeri yari imbere ya Hoteli yabagamo umuryango w’umugabo we, Ntahobali Shalom, umuhungu wa Nyirabamasumbuko Pauline wari Minisitiri muri Leta yiyise iy’Abatabazi.

Uwunganira Munyenyezi ahakana ibyo byaha avuga ko muri icyo gihe umukiriya we yari atwite impanga ebyiri kandi atavaga muri hoteli; nk’uko www.unionleader.com ibitangaza.

Munyenyezi yageze i New York muri Amerika muri 1998, yimukira muri Leta ya New Hampshire mu 2002, nyuma y’umwaka umwe ahabwa ubwenegihugu bw’Amerika. Mu mwaka w’i 2010 yatawe muri yombi aba i Manchester n’abakobwa be batatu.

Nshimiyimana Leonard