Mudakemwa Pascal wiyemerera icyaha akanasaba imbabazi, avuga ko ngo atamwishe yabigambiriye kuko yabitewe n’uburakari bwaturutse ku ntonganya bari bagiranye mu rugo zikamara umwanya, ndetse baza no kuzikomeza aho bari bagiye gusangirira mu kabari k’umutobe.

Mudakemwa Pascal ari imbere y’abacamanza n’ubushinjabyaha.

Ngo bavuye muri aka kabari bageze no mu rugo bakomeza gutongana, ni uko bagera ubwo barakaranya cyane umugabo agira uburakari avuga ko bwamutunguye aza kumukubita igiti mu mutwe ahita apfa.

Abatangabuhamya batanu harimo n’umukobwa wa Mudakemwa witwa Nubahwe Gisele yabwiye urukiko ko mu ijoro ryo kuwa 19/01/2014 yumbise mama we ataka, maze asohotse asanga intumbi ya nyina iryamye mu nzu, ise ahita amubwira ati “Dore intumbi ya nyoko, nanjye nijyanye kuri polisi.”

Mudakemwa Pascal hamwe n’umwunganira.

Umushinjacyaha yavuze ko amakuru yatanzwe n’abatangabuhamya batandukanye yemeza ko izo ntonganya zari zaturutse ku kuba uyu mugabo atarumvikanye n’umugore we ku kugurisha inka y’urugo, umugabo yashakaga kugurisha ngo yishyure amafaranga y’ubudehe yari yarahombye kuko yari umubitsi w’itsinda ry’ubudehe.

Uru rubanza rwabereye mu ruhame maze abatuye ahakorewe icyaha babonereho guhabwa ubutumwa bwo gukumira impfu zituruka ku makimbirane yo mu ngo ndetse abaturage barebe ingaruka z’ubwicanyi buba hagati y’abashakanye, babonereho kwirinda gukora ayo mahano.

Abaturage benshi bari bitabiriye urubanza beretswe igiti Mudakemwa Pascal yicishije umugore we.

Abayobozi b’akarere ka Gicumbi ngo batangiye gahunda yo kwigisha ingo zigaragaramo amakimbirane kugira ngo bakumire ubwicanyi n’ubwumvikane buke buva kuri uko kumvikana guke hagati y’abashakanye. Urukiko rwanzuye ko uru rubanza ruzasomwa kuwa 25/04/ 2014.

Ernestine Musanabera