Uwo musore akekwaho kuba yarihandagaje akavuga ko aho kumva indirimbo z’icyunamo yakumva Ndomboro ya Solo ngo anongeraho n’umujinya mwinshi ko arambiwe isoko y’Abatutsi no kuyoborwa nabo.

Yanavuze ko adashaka kuyoborwa n’Umututsi witwa Ignace ariwe mukuru w’umudugudu wa Gakenyeri A mu kagali ka Nyanza mu murenge wa Busasamana atuyemo.

Ayo magambo yuzuyemo ingengabitekerezo ya Jenoside yayavuze tariki 13/04/2012 ubwo mu gihugu hose hasozwaga icyumweru cy’icyunamo cyo kwibuka ku nshuro ya 18 Jenoside yakorewe abatutsi muri Mata 1994.

Mu nama y’umutekano y’akarere ka Nyanza yabaye tariki 30/04/2012 hatanzwe izindi ngero z’abaturage bagiye bagaragaza ingengabitekerezo ya Jenoside mu biganiro bijyanye n’icyunamo cyo kwibuka ku nshuro ya 18 Jenoside yakorewe Abatutsi muri Mata 1994 mu Rwanda.

Nk’uko byatangajwe muri iyo nama ngo tariki 10/04/2012 hari undi mugabo witwa Uhagaze Silas nyuma yo kumva ibiganiro byari bijyanye n’icyumweru cyo kwibuka abazize Jenoside yakorewe Abatutsi byaberaga muri buri mudugudu yasabye ijambo avuga ko nta mututsi n’umwe wazize Jenoside mu kagali ka Gahunga mu murenge wa Nyagisozi.

Abari aho bahise bagwa mu kantu nta kuzuyaza bahita bamuta muri yombi ashyikirizwa polisi yari ibegereye; nk’uko Mutabaruka Paulin umunyamabanga Nshingwabikorwa w’uwo murenge abivuga.

Jean Pierre Twizeyeyezu