Ubushinjacyaha buvuga ko Musinguzi Issa yatekeye imitwe umukobwa witwa Farida akamuha amafaranga ibihumbi 200 amubeshya ko amuha umuti utuma abona umugabo. Musinguzi kandi yanabeshye uwitwa Karasira Didace utuye mu Murenge wa Karangazi ko uzamuha umuti uzatuma umugore we abyara.

Mu gihe uregwa yemeza ko asanzwe ari umuvuzi gakondo muri Uganda, ubushinjacyaha buvuga ko yihaye ububasha bwo gukora umwuga w’ubuvuzi dore ko ubwo yaburanaga nta cyangombwa na kimwe kimwemerera gukorera ako kazi mu Rwanda yari afite. Musinguzi avuga ko afite certificats ebyiri yaturukanye muri Uganda zerekana ko asanzwe ari umuvuzi gakondo nubwo ubwo yaburanaga ntazo yari afite.

Musinguzi yemera ko hari amafaranga yahawe n’abamurega ariko ntiyemere umubare. Ubushinjacyaha bwemeza ko Farida yamuhaye amafaranga ibihumbi 200 ariko Musinguzi we avuga ko Farida yamuhaye ibihumbi 20. Musinguzi kandi avuga ko Karasira Didace yamuhaye ibihumbi 30 n’ihene nyamara ubushinjacyaha bwo buvuga ko Gasasira yamuhaye amafaranga ibihumbi 300.

Ubushinjacyaha butanga abatangabuhamya babiri bemeza uburyo abarega bahaye Musinguzi Issa ayo mafaranga. Ubushinjacyaha bwasabiye Musinguzi kuba afunzwe imunsi 30 kugira ngo adatoroka ubutabera mu gihe bugishaka ibindi bimenyetso.

Musinguzi we avuga ko yifuza koherezwa iwabo Uganda akazaba ariho aburanira. Ikifuzo cyo kuburanira iwabo abacamanza bakaba bacyanze bavuga ko inkiko z’u Rwanda zifite ubushobozi bwo kumuburanisha kuko ibyaha yabikoreye mu Rwanda abikorera Abanyarwanda.

Perezida w’urubanza yasabye ko aba yongeye gufungwa mu gihe bategereje gusoma urubanza tariki 04/04/2012.

Niyonzima Oswald