Uregwa wavutse mu mwaka wa 1994, atuye mu Mudugudu wa Bereshi, Akagari ka Kizibere, Umurenge wa Mbuye, Akarere ka Ruhango, Intara y’Amajyepfo. Ku itariki ya 23 Mutarama 2020, mu masaha yo hagati ya saa kumi n’ebyiri n’igice na saa moya n’igice z’umugoroba, ngo yategeye mu nzira ahantu hari agashyamba umugore wari uvuye guhahira mu gasoko bita Ndaburaye, amusambanya ku gahato abifashijwemo n’undi mugabo mugenzi we utarabashije kumenyekana.

Inkuru Kigali Today ikesha Ubushinjacyaha Bukuru ivuga ko mu gihe uwahohotewe yari arimo ataha, abantu babiri bari inyuma ye, umwe yahise amutanga imbere amutambika akaboko gafashe icyuma mu ijosi, undi ahita azamura ingofero y’umupira uwo mugore yari yambaye, ahambirizaho igishumi yari afite, bahita bamukururira mu gashyamba kari aho bafata igitambaro (esharpe) yari afite bakimubohesha amaboko bayashyize inyuma, bayahuza n’ukuguru baguhinnye.

Umugore kuvuga byaramunaniye, bahita bashishimura imyenda yari yambaye umwe muri bo atangira kumusambanya mu gihe mugenzi we yari afatiye icyuma mu ijosi kugira ngo uwo mugore atavuga, uwamusambanyaga arangije abwira mugenzi we ngo ako kagore bakareke kazagwe ahandi, bahita biruka, umugore abona gutaka. Uwamwumvise bwa mbere atabaza ni we waje kumubohora.

Uregwa yahamwe n’icyaha cyo gusambanya ku gahato, giteganywa kandi kigahanwa n’ingingo ya 134 mu itegeko No 68/2018 ryo ku wa 30/8/2018 riteganya ibyaha n’ibihano muri rusange.

MENYA UMWANDITSI

Malachie Hakizimana

Umunyamakuru

@ h_malachie

Reba inkuru zose nanditse ( 1526 )