Maitre Gashabana wunganira Ingabire yemeje ko Uwumuremyi yakoranaga n’ubushinjacyaha ndetse n’inzego ziperereza na Polisi, kuko mu rubanza hagaragara amazina y’uwo bita Adolph na Hadjiboss, abo bose Colonel Habimana avuga ko binjijwe mu Rwanda babifashijwemo na Vital.

Kuri uyu wa Gatatu tariki 11/04/2012, Maitre Gashabana yagize ati: “Kuki urukiko rudashaka kubaza inkomoko ya bariya bantu? Ntabwo urukiko rushaka kumenya ukuri?”

Ubwo yari imbere y’urukiko, Colonel Habimana yatangaje ko Adolph atazwi aho afungiwe ariko Hadjiboss uzwi ku izina rya Hakizimana alias Hadjiboss we yemeza ko afungiwe ku Murindi.

Habimana ufungiye muri Gereza ya Kimironko ubuzima bwe bwose nyuma yo gukatirwa n’inkiko Gacaca, avuga ko yamenyanye na Uwumuremyi ubwo bari bafunganye i Kami.

Yongeraho ko Uwumuremyi yamubwiye ko yakoranye n’inzego z’iperereza bamubwira ko baramutse bashakishije ibintu bashinja Ingabire bahita barekurwa bagataha.

Ubushinjacyaha ntibwemeranyijwe na Gatera, mu byo bwita “Ecarte du debat” bivuze ko yazanye ingingo atigeze avuga mbere muri dosiye y’uko Uwumuremyi yaba yarigeze gucyura abantu mu Rwanda.

Ubushinjacyaha bwanasabye Gatera Gashabana kugaragaza inkomoko y’aho yakuye ibyo avuga y’uko Uwumuremyi yaba akorana n’inzego ziperereza n’ubushinjacyaha.
Urubanza rurakomeza kuri uyu wa Kane tariki 12/04/2012, Ingabire n’abamwunganira bakomeza gutanga ibindi bimenyetso.

Ingabire aregwa ibyaha bitandukanye bigera kuri bitandatu birimo kubuza igihugu umudendezo.

Emmanuel N. Hitimana