Urukiko rwasanze bashobora kuba barakoze ibyaha birimo icy’inyandiko mpimbano, by’umwihariko rwiyemezamirimo Twahirwa Jean Claude akaba akekwaho gutanga ruswa kugira ngo abashe kubona isoko ryo kubaka inyubako y’ibiro by’akarere kuko ngo nawe hari ibyo yiyemera.

Kuri Munyanziza Zephanie, urukiko rwasanze ashobora kuba yarakoze ibyaha birimo korohereza rwiyemezamirimo kwishyurwa, kumwongerera igihe cyo kurangiza inyubako hagamijwe kumusonera ibihano yagombaga gucibwa, kwishyura imirimo itarakozwe no kugirana akagambane n’upiganira isoko.

Munyanziza Zephanie na bamwe mu bo bafunganywe bakatiwe igifungo cy’iminsi 30 y’agateganyo.

Nubwo nawe agomba kuba afunze iminsi 30 kubera icyaha akekwahon cy’inyandiko mpimbano, urukiko rwagaragaje ko ubushinjacyaha butagaragaje impamvu zifatika z’uko Nzeyimana Phocas yaba yarakoze icyaha cyo gutanga inyungu zidafite ishingiro mu ishyirwa mu bikorwa ry’amasezerano yo kubaka ibiro by’akarere rukimuhanaguraho.

Urukiko rwafashe imyanzuro wo kubafunga kuko ngo bashobora gusibanganya ibimenyetso cyangwa se bagatoroka kuko ibyaha baregwa bikomeye.

Rwategetse kandi ko abakozi batatu barekurwa by’agateganyo aribo uwari ukuriye akanama k’amasoko ndetse n’abandi bakozi babiri bashinzwe iby’amasoko. Urukiko rwavuze ko rwasanze nta mpamvu zifatika zatuma bakomeza gukurikiranywa bafunze, gusa ngo bazajya bitaba urukiko uko rubahamagaye.

Tariki ya 25 Werurwe 2015 nibwo ubushinjacyaha bwari bwagaragarije urukiko rw’ibanze rwa Nyamata impamvu zituma aba bose bakekwaho ibyaha, bityo bugasaba ko bafungwa by’ agateganyo mu gihe iperereza rigikomeje.

Egide Kayiranga