Nkurikiyimana yari yakatiwe n’urukiko rwa Rusizi gufungwa iminsi 30 y’agateganyo nyuma y’uko amafaranga asaga miriyoni umunani n’igice yo muri sacco ya Bushenge zari zigenewe abakene bo muri VUP ziburiwe irengero.

Bizuru Isaac yafashwe ubwo yari akiryamye mu rugo mu karere ka Karongi abapolisi bakamusaba gusohoka akanga gusohoka bikaba ngombwa ko bamena urugi bakamusangamo bamara kumufata akanga kugenda.

Umwe mu babibonye avuga ko uyu munyamabanga nshingwabikorwa yanze kugenda ahubwo akaryama mu muhanda kugeza ubwo abaturage bamuteruye bamushyira mu modoka kugeza agejejwe aho agomba gufungirwa.

Agira ati “byari bitangaje kubona umuyobozi aryama mu muhanda akanga kugenda ngo ajye gufungwa nk’uko inkiko zari zabitegetse kugeza ubwo abaturage bamwikuriye mu muhanda”.

Polisi ya Nyamasheke yemeza aya makuru, ikavuga ko n’ubwo yari yaratorotse ubutabera yakomeje gushakishwa kugeza abonetse ndetse akaba yamaze kugezwa muri gereza ya Rusizi.

Kuri ubu haracyashakishwa umucungamutungo wa Sacco ya Bushenge, Kimazi Jimmy, na we wakatiwe gufungwa iminsi 30 mu gihe agitegereje kuburana urubanza mu mizi.

Uyu munyamabanga nshingwabikorwa w’umurenge wa Bushenge afunganywe n’uwari umuyobozi wa VUP mu murenge wa Bushenge, bashinjwana ubufatanyacyaha.

Umugwaneza Jean Claude