Ibi Prof. Rugege yabigarutseho mu muhango wo gusoza icyumweru cyahariwe kurwanya ruswa mu nkiko wabereye mu Karere ka Musanze ku wa Gatanu tariki 13/02/2015.

Agira ati “Urugamba rwo kurwanya ruswa ntabwo ari urw’Urwego rw’Umuvunyi gusa. Tuzi ko Urwego rw’Umuvunyi ari rwo rubishinzwe umunsi ku wundi ariko ntabwo barurwana bonyine; ntabwo ari nzego za Leta nk’ubucamanza gusa bigomba kurwanya ruswa, urugamba ni urwacu twese nk’Abanyarwanda kugira ngo turamire ubukungu bwacu buduteze imbere”.

Akomeza avuga ko uwatanze ruswa n’uwayakiriye baba bitesheje agaciro n’ubumuntu. Ngo ni ibintu bibabaje kuba umucamanza yakwaka ruswa abamugana akababuza ubutabera kandi ari we wagombye kubutanga.

Imibare itangwa n’inzego z’ubutabera ivuga ko kuva muri 2005 iyi gahunda yo kurwanya ruswa mu nkiko yatangira, abakozi bo mu nkiko 27 baguye mu byaha bya ruswa bahanishwa kwirukanwa no gukurikiranwa n’ubutabera.

Perezida w’Urukiko rw’Ikirenga yasabye kandi abagana inkiko kwirinda abigize abakomisiyoneri mu nkiko bababwira ko hari icyo bazafasha mu nkiko bakabasaba amafaranga ya ruswa.

Mu butumwa yagejeje ku baturage, Guverineri Bosenibamwe Aimé na we witabiriye uyu muhango yabasabye gufatanya n’inzego za Leta guhashya ruswa imunga ubukungu bw’ igihugu, batungira agatoki inzego zibishinzwe umuntu wese utanga cyangwa waka ruswa.

Abaturage baganiriye na Kigali Today bavuga ko ruswa ari mbi ku iterambere ry’umuturage kuko iyo agize icyo atanga aba ahombye ibyakamuteje imbere, kandi hari n’ingaruka z’uko yafungwa.

Nyirambonigaba Eugenie, umwunzi wo mu Murenge wa Gacaca mu Karere ka Musanze agira ati “Ahomba byinshi niba yaburaniraga miliyoni ebyiri atangamo imwe kandi banamufata agafungwa bya bindi byose mu rugo bikangirika”.

Nsengiyumva Pacifique, umumotari mu Mujyi wa Musanze yunzemo ati “Ruswa ni mbi… ni yo waba uri mu kuri iyo utanze ruswa nta shingiro kuba gufite”.

Icyumweru cyo kurwanya ruswa cyari gifite insangamatsiko igira “Ruswa imunga ubumuntu, ikakugira ikintu tuyamagane” cyaranzwe n’ibikorwa bitandukanye birimo gutanga ibiganiro ku maradiyo no kuburanisha imanza zose zashyikirijwe inkiko zijyanye na ruswa. Imanza 60 za ruswa zaraburanishijwe nk’uko byemejwe n’umuvugizi w’inkiko.

Igikorwa cyo gusoza iki cyumweru cyabimburiwe n’urugendo rwo kwamagana ruswa rwitabiriwe n’abaturage, abanyeshuri, abamotari n’abashoferi bo mu Karere ka Musanze, gisozwa n’umukino w’umupira w’amaguru wahuje abakozi bo mu nkiko n’abakozi bo mu nzego z’ibanze mu Karere ka Musanze.

NSHIMIYIMANA Leonard