Nzeyimana Oscar uyobora akarere ka Rusizi yabwiye aba bakozi ko raporo iherutse gukorwa yagaragaje ko mu nzego z’utugari n’imirenge hatangwa ruswa zitandukanye ku bayobozi aho ngo abashaka serivisi runaka bazihabwa ari uko bagize icyo batanga.

Umuyobozi w’akarere ka Rusizi kandi yatangaje ko nubwo ruswa itwangwa ari nkeya ariko ngo itangwa n’abantu benshi, aha abatungwa agatoki ni abanoteri, abasoresha , abatwika amatafari mu matanura babifashijwemo n’aba agurunomi b’imirenge n’utugari, abatanga ibyangobwa byo kubaka no gusana, abaveterineri b’imirenge n’utugali abashinzwe kwemeza abagomba gufashwa mu byiciro by’abatishoboye nko muri VUP n’abandi.

Ibyo byo byose ngo bigaragaza kumungwa kw’akarere aho usanga buri wese yarishwe n’amaco y’inda ariko ngo nubwo bitarashyirwa ahagaragara umuyobozi w’akarere yasabye abo bayobozi kwitondera ibyo bakora muri serivisi zabo kuko ruswa ituma igihugu kimungwa kandi n’akazi ntigakorwe neza nk’uko bigomba.

Muri aba bitabiriye inama nta numwe wagize icyo atangaza ku bibavugwaho yewe nabo twegereye ngo bagire icyo badutangariza bose birinze kugira icyo batangaza kubyo bavugwaho.

Musabwa Euphrem