Abaturage bo mu mirenge igize akarere ka Nyamasheke bazahabwa amahugurwa ndetse banakire ibibazo by’akarengane ku bufatanye bw’urwego rw’umuvunyi n’inzego z’ibanze; nk’uko ibaruwa yandikiwe ubuyobozi bw’akarere yashyizweho umukono n’umuvunyi mukuru w’umusigire, Nzindukiyimana Augustin ibigaragaza.

Abaturage b’akarere ka Nyamasheke ndetse n’abandi bahafite ibibazo barasabwa kuzitabira iyi gahunda kugira ngo barebere hamwe uburyo byakemuka.

Gahunda y’iki cyumweru iteganijwe ku buryo muri buri murenge hazakorwa site ebyiri maze abaturage b’utugari twegeranye bakajya bahurira hamwe bagafatanya muri zo gahunda.

Iyi gahunda igamije kwegereza abaturage ubuyobozi ndetse na serivisi nziza bakeneye no kubagabanyiriza ingendo bakora bagana inzego z’ubuyobozi.

Gahunda nk’iyi yigeze gutegurwa n’akarere tariki 07-14/08/2012 aho ikipe igizwe n’umukozi w’akarere ushinzwe imiyoborere no kwegereza ubuyobozi abaturage, ingabo, polisi, umukozi w’inzu itanga ubufasha mu by’amategeko (MAJ), abakozi b’imirenge, ab’utugari n’abayobozi b’imidugudu bahuriraga hamwe maze bagafatanya gukemura ibibazo by’abaturage.

Emmanuel Nshimiyimana