KT TV
Nyagatare: Abaregwa gukubita umunyamakuru basabye kuburana bari hanze
Kalisa Sam, Umukuru w’Umudugudu wa Rubona Akagari ka Rwisirabo Umurenge wa Karangazi n’umuturage witwa Mutsinzi Steven, basabye urukiko rw’ibanze rwa Nyagatare kuburana bari hanze mu rubanza bakurikiranyweho gukubita umunyamakuru w’igitangazamakuru cyitwa Flash.
Babisabye ku wa Kane tariki ya 29 Nyakanga 2021, ubwo urukiko rw’ibanze rwa Nyagatare rwatangiraga kumva abaregwa ku ifunga n’ifungurwa ry’agateganyo.
Kalisa Sam na Mutsinzi Steven bakurikiranyweho icyaha kimwe cyo gukubita no gukomeretsa ku bushake, ariko babwiye urukiko ko batigeze bakubita Ntirenganya Charles.
Basabye urukiko kubarekura bakajya baburana bataha mu ngo zabo kuko bafite umwirondoro uzwi kandi badashobora gutoroka ubutabera.
Ni mu gihe Ntirenganya Charles we yasabye ko baburana bafunze kuko bari hanze basibanganya ibimenyetso cyangwa bakaba batoroka dore ko ngo hari mugenzi wabo bafatanyije kumukubita waburiwe irengero.
Urukiko rwabamenyesheje ko ruzatanga umwanzuro warwo tariki 03 Kanama 2021.
Ku wa 18 Nyakanga 2021, nibwo Ntirenganya Charles na mugenzi we Mukunzi Fidele bose bakorera Flash bagiye gutara inkuru ku baturage ngo babujijwe kujya kuvoma birangira Ntirenganya ngo akubiswe n’Umukuru w’Umudugudu yashakagaho inkuru.
Ibitekerezo
Ohereza igitekerezo
|
|
