Umushinjacyaha mukuru Jean Bosco Mutangana (ibumoso) avuga ko ubushinjacyaha buhora bushakisha uko bwafata abakomeye barya ruswa

Umushinjacyaha mukuru, Jean Bosco Mutangana, yavuze ko mu bayobozi bakomeye harimo abarya ruswa, ariko ko bafite amayeri menshi yo kwihisha ubutabera ku buryo kubafata bitoroshye.

Byatangarijwe mu kiganiro urukiko rw’ikirenga n’ubushinjacyaha bagiranye n’itangazamakuru ku wa mbere tariki 11 Gashyantare 2019, hatangizwa icyumweru cyahariwe kurwanya ruswa.

Muri iki kiganiro hagaragajwe ko abenshi mu bakurikiranweho icyaha cya ruswa ari abaturage baciriritse, biganje mu cyiciro cy’abakora ubuhinzi, abashoferi ndetse n’abandi.

Ikiganiro cyitabiriwe n’inzego zinyuranye zifite aho zihurira n’ubutabera

Nyamara ariko, Umushinjacyaha mukuru Jean Bosco Mutanga yavuze ko no mu cyiciro cy’abayobozi mu nzego zinyuranye harimo abarya ruswa, kandi ko ubushinjacyaha buhora bushaka uko bwabafata.

Ati ”Dukunda kuvuga ngo imbere y’amategeko nta munini nta muto, ariko rwose twemera ko hari n’abakomeye bayijandikamo, abo natwe turaribwaribwa kugira ngo tubafate.”

“Ni na bo bayijandikamo cyane. Bariya batagaragara b’abayobozi, bari mu masoko ya Leta, bakorana na ba rwiyemezamirimo, bafungura amabahasha y’amasoko, n’ibindi byinshi, ngira ngo abo ni bo bakwitwa ibifi binini”.

Mutangana ariko yavuze ko gufata aba bantu bigoranye, kuko bafite ubwenge bwinshi bwo kuyihisha.

Yavuze ko ubushinjacyaha buhora bushakisha amakuru ku bantu bakomeye barya ruswa ngo bahanwe, kuko iyo iki cyaha gihanwe haherewe kuri bene abo ari bwo iba ihanwe bya nyabyo.

Ati ”Icyo nababwira ni uko ruswa ihanwa bikumvikana neza ko yahanwe, iyo duhannye duhereye hejuru kuri ba bandi bakomeye. Ibyiciro by’abashoferi birahari ba bandi batanga ruswa, ariko bariya si bo batanga menshi. Abaka menshi ni bariya bakomeye. Iyo rero bahanwe ni bwo ruswa iba ihanwe, kuko ubutumwa buba butanzwe kuva hejuru mu bushorishori”.

Muri iki cyumweru cyo kurwanya ruswa cyatangijwe, insanganyamatsiko igira iti “Nta kibazo gikemurwa na ruswa mu rukiko, izere ubutabera”.

Hazibandwa ku bikorwa birimo guca imanza zirebana na ruswa mu nkiko zose, ndetse hakazajya hanatangwa ibiganiro ku kurwanya ruswa, mbere y’uko iburanisha ritangira mu rukiko.

Visi perezida w’urukiko rw’ikirenga Kayitesi Zainabu Sylvie (uri hagati) yasabye abaturage kwizera inkiko

Umuyobozi wungirije w’urukiko rw’ikirenga Kayitesi Zainabu Sylvie, yasabye abaturage kwizera ubutabera, kuko inshingano z’umucamanza ari ugutanga ubutabera akarenganura abarengana kandi abagomba guhanwa bagahanwa.

Ati ”Inshingano z’umucamanza ni ugutanga ubutabera, ahubwo abashaka kumuyobya ni abashaka kumwinjiza mu bikorwa bya ruswa, ariko we icyo agomba kugira mu mutima we ni ugutanga ubutabera, akabuha ubukwiriye, utabukwiriye agahanwa kuko n’ubundi ababurana ari babiri, umwe aba yigiza nkana”.

Imibare igaragaza ko mu gihembwe cya mbere cy’uyu mwaka w’ubucamanza hamaze guburanishwa imanza 59 zirebana na ruswa, zarezwemo abantu 68.

Mu nkiko ho, mu mwaka ushize wa 2018, haburanishijwe abanditsi b’inkiko babiri banahamwa n’icyaha cya ruswa, mu gihe mu mwaka wari wabanje wa 2017 hari haburanishijwe umwanditsi umwe.

Ruswa kandi ngo inagaragara mu bashinjacyaha cyane cyane abo ku rwego rw’ibanze, mu bahesha b’inkiko b’umwuga ndetse no mu bunganira abantu mu nkiko.

MENYA UMWANDITSI

Charles Ruzindana

Umunyamakuru

@ CharlesRUZINDA2

Reba inkuru zose nanditse ( 672 )